اللامعقوليزم

سنة حلوة علينا

2007-12-27T10:08:00.000-08:00

كل سنة واحنا طيبيين كلنا هنا

مع ان البيت اصحابه مشغوليين عنه شوية

لكن هايفضل عامر بانفاسنا وهى بتمر عليه من برة برة كده

وحشتونى طبعا

وواحشنى النت والكومبيوتر والكى بورد

المهم سنة جديدة حلوة باذن الله علينا كلنا و يارب كلنا وكل اللى بيعدوا من هنا ينولوا اللى بيتمنوه فيها

قولوا امين.

لكــم دينكم و ليا دينى

2007-07-28T03:36:00.000-07:00

مش عارفه ليه كل ما آجى اكتب هنا يبقى الموضوع حيوى و مصيرى و شائك و بعدين اتشتم بسببه . المهم الموضوع بتاع المرة دى موضوع عن الطفلين ماريو و آندرو . و للى ميعرفش القصه فالحدوتة كالتالى كان يا ما كان واحد اسمه مدحت اتجوز واحده اسمها كاميليا و الاتنين مسيحين أباً عن جد و بعدين جابوا 3 أطفال بس فجأة الزوج اعلن إسلامه و ساب مراته و عياله لمدة 7 سنين . بس كان فى بين الزوجين قواضى و محاكم لان الزوجة عايزة تتطلق فالزوج رفع قضية ان الزوجة مش اهل للحضانة بتاعة الأولاد لانها مسيحيه و هو مسلم و بالتالى كما مذكور فى عريضة الدعوى الزوجة تعلم الطفلين الفسق و الفجور . و لما مراته رفعت قضية نفقة عمل دعوة لابطالها باعتبار انها ناشز لانه لما طلبها فى بيت الطاع قدمت مذكرة اعتراض . و الزوج نكاية فى مراته سجن ابنه الكبير اللى عمره 20 سنه - معرفش ايه ملاباسات الموضوع - و بعد 7 سنين من اشهار اسلامه - مع العلمان مراته رافعه عليه قضيه لانه ارتد عن الاسلام لمدة سنة و بعدين رجع تانى - المهم الزوج قدم ورقة فى مدرسة الولدين يناير اللى فات بعد ما عمرهم بقى 13 سنة انهم بقوا مسلمين تبعا لديانة الأب و برغم ان قضية الردة بتاعة الزوج ما اتفصلش فيها و لا قضية الحضانه و لا فى نص صريح فى القانون او الدستور بينص على ان الابناء على دين والدهم لكن ده طلع فى الشريعه مش بنص صريح المهم الادارة قررت من نفسها الطفلين يمتحنوا دين اسلامى بدل دين مسيحى و كانت النتيجه ان الطفلين رفضوا و كتبوا فى ورقة الاجابة انا مسيحى فسقطوا و لما جه امتحان الدور التانى عملوا نفس الموضوع فسقطوا و هيعيدوا السنه علشان الدين . الرواية دى كلها رواية الزوجه يعنى فى حلقة مفقوده لكن ده ميمنعش ان ممكن حد يقول طب ما الزوج ممكن يكون بيعمل ده نكاية فى مراته بدليل انه بعيد عن ولاده تماما لا بيشوفهم و لا بيصرف عليهم يعنى لو عايز يحببهم فى الاسلام كان اتكلم معاهم عنه . الواقعه دى اتقدمت فى برنامج العاشرة مساءاً و كانت حلقه اكترها تليفونات .

الجميل ان اغلب التليفونات و اللى كانت كلها من مسلمين باستثناء مكالمتين كانت متعاطفه مع الاطفال و شايفين ان ده تعسف و ان لا اكراه فى الدين . و سعاد صالح اتصلت فى البرنامج و قالت ان الاطفال من حقهم يختاروا دينهم عند البلوغ يعنى كمان سنتين و لحد ما يبلغوا ممكن يمتحنوا الدين الاسلامى فى المدرسة و يفضلوا مسيحين و بيمارسوا عقيدتهم طب ياسلام يعنى هم هيضحكوا على ربنا و للا هيأسلموا علشان القانون بيقول كده ؟ ماهو الدين مش لعبة . كان فى مكالمة بقى بوصفها ان أسوء مكالمة فى الحلقه كانت من واحده ست اسمها مدام ساميه فضلت تتخانق مع الام و تقول انها تلاقيها بتقول للاطفال كلام وحش عن الاسلام و انها المفروض تحببهم فيه و تحاول تقربهم منه راحت منى الشاذلى قالتلها يا سلام يعنى لو واحد ارتد مثلا عن الاسلام الزوجه هتحبب ولادها فى الدين التانى ازاى يعنى ؟ و الست قالتلها انهم يأسلموا السنتين دول لحد البلوغ و لما منى قالتلها و بعد كده يرجعوا لدينهم ؟ قالتلها لا كده ده يبقى مرتدين . فمنى قالتلها طب لو فرضنا العكس حصل كان رأيك هيبقى كده ؟ قالتلها مينفعش العكس يحصل مينفعش حد يرتد عن الاسلام .

طب يعنى مثلا هو احنا ديننا شيكولاته و هم دينهم يع ما هو المنطقى ان كل واحد مؤمن بدينه و شايفه هو الصح و مش عايز حد يرتد عنه . يعنى مينفعش اقول محدش يخرج عن الاسلام لانه هيبقى كافر و لو هم قالوا كده عن اللى يرتد عن دينهم يبقى اقول عليهم غلطانين .

أنا شايفه ان الاطفال نفسيتهم هتدمر و المشكله ان كده هيكرهوا الاسلام . بس فى المجمل كانت كل الآراء بتقول ان الاطفال يتسابوا على دينهم لحد البلوغ و مينفعش يسقطوا فى مدارسهم .

فى نقطة قالتها الزوجه برضه كانت بتقول ان اولادها يتبعوا دين الزوج لو هى متجوزاه من الاول مسلم أو لو جوزها أسلم قبل ما تولد اى حد من عيالها لكن مش بعد 13 سنه ييجى يقولهم و هم كل اهلهم مسيحين ان دينهم ده دين كفر . نقطة كمان أشار اليها مفكر معاصر من اللى اتكلموا كان بيقول ان مفيش قانون او مادة فى الدستور بتقول ان الاطفال يتبعوا دين الأب و لو ده فى الشريعه يبقى يكون فى ماده صريحه بده اما لو فى ماده بتقول ان الاولاد يتبعوا دين الزوج لو كان مسيحى و اسلم فى حين ان مينفعش العكس يبقى ده شئ يعيب للبلد و للا دلوقتى افتكرنا اننا دولة اسلامية و خلاص كل احكام الشرع البلد بتطبقها

أيا كان انا معرفش فى القانون و لا اعرف كويس فى احكام الشريعة بس مقدرش أؤمن بفرض دين على حد حتى لو كان دينى

و فى النهاية تبقى دى رواية الزوجة و يبقى الوضع على ما هو عليه و عمار يا مصر

!! والنبي ناولوني الولاعة

2007-06-25T17:45:00.000-07:00

خبر صغير بريء مكتوب بفونت متوسط على شمال الصفحة المشئومة (حوادث وقضايا) بيقول " فصل مدرس هتك عرض تلميذاته " !

المحكمة التأديبية قضت بفصل المدرس اللي هتك عرض 5 من تلميذاته اللي لسة في الابتدائية أثناء ما كان بيديهم دروس خصوصية وبصراحة معرفش أضحك ولا أعيط لكن أعتقد اللطم رد فعل مش بطال مبدأياً!

و مش قادرة أتخلص من حالة الذهول لحد دوقتي لعدة أسباب:

أولاً المفروض دول أطفال ياعالم لسة ميعرفوش حاجة لسة بمنتهى البراءة اللي ربنا خلقهم بيها أفهم أنا بقى المدرس الحيوان ده ايه مبرراته المقنعة في إنه يعمل كدة؟

ثانياً إن المدرس ده (الحيون برضو) المفروض إنه يكون أبوهم أو أخوهم الكبير والمفروض إنهم في حمايته طول ما هما معاه لكن واضح إنه استباح كل حاجة وقرر يكون حاميها حراميها باعتبار إن هو ده المبدأ اللي البلد كلها بتطبقه حالياً و تقريباً ده المبدأ الوحيد اللي بلدنا بتطبقه بضمير متفاني بجد!

ثالثاً وهو الأدهى إن المدرس(خلاص عرفنا صفته دوقتي) اتقدم لمحكمة تأديبية!! على أساس إنه مثلا داس على رجل الناظر أو نسي يدي كشكول التحضير للموجه(يانهار إسود!!) يعني يهتك عرض خمس بناااااااات و يضيع مستقبلهم وبراءتهم ويدمرهم نفسياً ويبوظ حياتهم بالكامل والمصيبة إنه يرتكب جريمته البشعة دي خمس مرات وعادي احنا زي الفل مجرد نقدمه لمحكمة تأديبية!! مش جنح ولا جنايات(يستاهلها وأكتر) لأ محكمة تأديبية بمعنى أدق دم خمس بنات مش مهم للدرجة عند الوزارة وعند الحكومة بالتبعية!

رابعاً وأخيراً قرار الفصل اللي هو من نوعية إن الوزارة قالت للمدرس انت وحش وشرير واحنا زعلانين منك ومش هنكلمك تاني يلا امشي بقى روح اعمل اللي انت عايزه في ناس تانين!واحد زي ده المفروض بدون أي مبالغة يترجم لحد ما يموت أو يتعدم، إذا كنا بنرضى بحكم المحكمة بسبع سنين و أكتر في حالات هتك العرض للكبار ما بالنا بالأطفال أعتقد ده يستحق يتشنق خمس مرات!

وعشان ما بقاش ظالمة ومفترية مش هطالب بإعدام وزير التربية والتعليم في ميدان عام ولا هطالب حتى بالحكم عليه 25 سنة مؤبد بسبب جرايمه ابتداءً ب(آية) صاحبة موضوع التعبير إياه مروراً ب(أميرة) ضحية موكب سيادته وانتهاءً بالخمس بنات دول لكن كل اللي اقدر أطلبه من السيد الوزير وأترجاه فيه إنه يخلي عنده شوية دم ويستقيل وربنا يعوض علينا في جيل بحاله!

الست دبلون المحاسبة

2007-04-19T13:19:00.000-07:00

كان يا ما كان

" من اسبوعين كنت فى ميكروباص و عمو السواق كان مشغل شريط دينى مكنش فيا اى دماغ اركز مع ناموسة حتى معدية بس قلت و ماله احاول اشوف الراجل بيقول ايه لقيته بيقول كلام غريب شوية . و كان عمال يقول امثلة على سلوكيات الصحابيات زمان و بيحكى قصص عن الرضا و الطاعة زى الزوجه اللى جوزها طلب منها مية فلما رجعت كان نام ففضلت واقفه جنبه من العشاء للفجر علشان لما يصحى يشرب . و و كان بعد كل مثال يقول طبعا بقى لو الزوجه دى دلوقتى كانت عملت كذا و كذا و كذا من ضرب للزوج و شتيمه و تريقه . و مش عارفه كان ليه ده التصور الوحيد لسلوك الزوجه الواقعى دلوقتى فى كل تخيلاته المنتقاه . طبعا مش عايزة اقول ان كان كل ما يحكى مثال الرجاله تضحك كانه قال نكته و انا حاساهم بيضحكوا على خيبتهم . يعنى لما واحد يقول لو مراتك بقى كانت زمانها قالتلك يخيبك يا منيل الاهى يشيلك معرفش ايه و حد يضحك يبقى بيضحك على ايه ده ؟ المهم القصه بقى اللى خرمتلى ودانى و كنت عايزة افجر الميكروباص قال ايه : صلوا ع النبى عمو الشيخ .. قصدى الشيخ احسن حد يفتكرنى بتتريق كان بيضرب مثل بقى فى الحياة الواقعيه مقارنة بقصة الست اللى فضلت جنب جوزها م العشاء للفجر مستنياه يقوم علشان يشرب و قال لو كان بقى الموضوع ده دلوقتى وواحد قال لمراته هاتى اشرب هتقوله ليه يا اخويا انت دبلون و انا دبلون ده انا كمان دبلون محاسبة يعنى تعالى احسبهالك لو انا روحت جبتلك تشرب و بعدين رجعت الكوبايه و رجعت الاوضه يبقى انا روحت و جيت 4 مرات انما انت لو روحت شربت و جيت يبقى مرتين بس يبقى تفتكر الصح ايه ؟انا فى سرى قلت ده ايه الست الواعية دى بس عمو الشيخ راح ضاربنى على دماغى بجملته اللى بعد كده بقى راح قالك ايه ؟ركز معايا ..راح قايل : أدى اللى خدناه من تعليم الستات بيتعلموا علشان يحسبوا يالهوى يا نافوخى ... هو ده الدرس المستفاد ان الست متتعلمش يعنى . أصله ماسكتش لحد كده لا ده فضل يتكلم عن تعليم المرأة و عيوبة الجسيمة و الرجاله فى الميكروباص تضحك ولولا انى كنت راجعه م اليوجا و قبلها الصيدليه و فعلا متكسرة كنت ممكن قلتلهم بتضحكوا على ايه و من ساعتها و انا حاطة فى قلبى و ساكته .. بس رجعت و قلت ابدا اهو ده اللى مش ممكن أبداً و أدينى جيت و قلت اللى محشور فى زورى

This Sucks

2007-03-29T10:33:00.000-07:00

تعمل إيه لو لقيت نفسك مش لاقى حلم مجسم

تقدر تحطله خطوات تمشى عليها

انت عارف إنك مش مرتاح فى الوضع اللى إنت فيه

لكن لسه مش قادر تحدد الوضع اللى يريحك

و بالتالى مضطر إلى حد ما تسكت

تفتكر تقدر تفصل حلم ؟

و للا تستنى لما تلاقى الموديل اللى يعجبك ؟

و للا تقضيها باللبس اللى عندك ؟

و للا تقول مش عاجبنى اللى عندى

فأنا بقى همشى عريان لحد ما ألاقى اللى على كيفى ؟

و للا تحط فى بقك جزمة قديمة و تعمل فيها عم الروش

و تيجى تكتب بوست زى دى ؟

! بيضربها

2007-02-27T11:38:00.000-08:00

بداية،أنا مش من بتوع جمعيات المرأة،ولا فيمنيست،ولا ليا أي اهتمام بحاجة سخيفة زي المجلس القومي للمرأة لأنه ملوش دور أولاً ولأن معظم اللي فيه ميعرفوش بجد يعني إيه ست مصرية .الموضوع هنا يبدأ بسؤال:ـ

كم مرة سمعت واحدة ست بتصرخ أو بتتضرب؟

بتحصل كتير تبقى قاعد في أمان ربنا وتلاقي زعيق وصرخات وشتايم وواحدة بتصوت علشان جوزها بيضربها،الأمر ممكن ميهمكش إلا في إنهم عاملين لك إزعاج،إنما هل فكرت في مشاعر اللي بتتضرب؟في وشها وجسمها اللي بيتملي رضوض وكدمات؟في الأولاد اللي غالبا بيتفرجوا على المأساة والفضيحة دي ونفسياتهم؟

نقطة عايزة أرجع فيها لأول جملة قلتها هنا،أنا مش بتحامل على الرجل بشكل عام،ولا بقول إنه همجي وما إلى ذلك،عارفة كويس أوي إن ضرب الزوج لزوجته معروف في الدين،وكمان عارفة إن الضرورة ممكن جداً تحكم بأن الزوجة تتضرب،زي بالظبط ما بتوجه أولادك أحياناً بالعقاب عن طريق الضرب،إنما أنا بتكلم هنا مش عن عقاب بسيط،إنما عن الضرب المبرح لدرجة تعريض الزوجة للخطر من كافة النواحي ـ

الدراسات بتقول إن في مصر امرأة واحدة من بين ثلاث نساء تتعرض للعنف من قِبل الرجل، وإن أكتر من 40% من السيدات المتزوجات بيتعرضن للضرب من أزواجهم يومياً حتى في بلاد متقدمة زي الولايات المتحدة وغيرها،طب ليه وعشان ايه؟

الرسول –عليه الصلاة والسلام-قال"رفقاً بالقوارير"،المرأة عامة أضعف من الرجل سواء جسدياً أو نفسياً،لكن ده مش مبرر على الإطلاق إن كل راجل شايف نفسه قوي انه يفتري على مراته بالضرب وبطريقة وحشية زي اللي بنشوفها دلوقتي.

لما سألت بعض السيدات المتزوجات عن موضوع الضرب اتفاجأت بردود غريبة،واحدة تقولي أصل المفروض الست لو شايفة جوزها راجع تعبان او متنرفز متتكلمش معاه،والتانية تقولي حقه يضربها ماهي مراته(!!!)أما التالتة فجاوبتني بأنها شخصيا اتضربت كتير لكن لانها ملهاش حد فحقها مبيجيلهاش واستحالة هتروح القسم تبلغ عن أبو عيالها إنه بيضربها!!!

ده نموذج من الستات،طبعا مش كلهم كدة،انا بس بعرض جانب من أراء بعضهن،ويبدو ان الجانب ده بالصدفة طلع جانب خاضع وقابل يتعامل معاملة شبه معاملة الجواري كدة!

الست الأولى بتفترض ان عصبية الرجل تمنح له الحق انه يفتري ويضرب ويبهدل الدنيا، مين قال كدة بقى ان شاء الله؟عصبية الواحد مهما بلغت لا يمكن تبرر له وحشيته في الضرب ده غير ان معظم الستات دلوقتي بتشتغل وبترجع تعبانة من الشغل زيها زي الراجل بل هي بتتهلك في البيت بعد الشغل بينما هو لأ،مين يتعصب أكتر؟مين عليه هموم أكتر؟مين بيستحمل اكتر؟!

المثال التاني لست واضح انها اتربت على ان كلمة ذكر في البطاقة معناها ان من حقوقه انه يضربها مهما وصلت درجة الضرب وزي ماهو عايز ولأهون سبب،دي ملهاش كلام عندي بصراحة غير اني اقول للصنف اللي بيفكر بالطريقة دي:تستاهلوا اللي بيجرالكوا!

أما المثال التالت فده مشكلة في حد ذاته،عاصرت بنفسي حالات لأزواج أول ما بيعرفوا ان الزوجة ملهاش حد غيره ولا ليها ضهر فبيفتري براحته اوي،يضربها يشتمها يطردها براحته بقى هو عارف ان محدش هيقف له في الآخر،وفي نفس الوقت الست هنا برضو عليها عامل كبير لأنها خضعت من البداية وقبلت تعيش كدة،لكنها في النهاية-ككل ست-مش حابة تخرب بيتها بايديها وتحصل على لقب"مطلقة"اللي هو اصلا وصمة عار ليها في المجتمع الحلو بتاعنا دلوقتي،برجع واقول ده مش مبرر في النهاية!

أنا عارفة ان فيه أزواج في منتهى الرحمة وعارفين ربنا وبيراعوه في تعاملاتهم مع زوجاتهم وده بصراحة اللي مخليني مش قادرة أعمم مقولة"الزواج نظام اجتماعي فاشل"لحد دلوقتي.

لكن ادام كل راجل محترم فيه عشرة عايزين الحرق،ومش بس بيأثروا على نفسية زوجاتهم اللي بتكون اتدمرت في النهاية وانما بيقتلوا أولادهم،المواقف اللي زي دي عمرها ما بتتمسح من تاريخ حياتهم ولا ذكرياتهم،نفسياتهم في الأخر بتبقى مشوهة بالظبط زي جسم الزوجة بعد الضرب المبرح من زوجها،ده اذا غضذنا النظر عن الحالات اللي بتوصل للاقسام ومحاضر البوليس والمحاكم والفضايح إلى آخره.

في حالة-وكلامي هنا للرجال بصفة خاصة-لو الخلافات بينكم كتيرة وكبيرة، فالمعروف هو أحسن حاجة،مش كل ما تتعصب تضربها،ممكن تسيبها لحد ما تهدوا انتوا الاتنين،أما لو المعاشرة أصبحت مستحيلة بينك وبين زوجتك فالطلاق موجود في النهاية كحل أخير،وياريت متنساش ان"كلكم راع وكلكم مسؤول عن رعيته".

آسفة على الإطالة،ربنا يدي اللي هيقرا الصبر بقى

من بعد سوبرمان

2007-02-11T14:07:00.000-08:00

في رواية "من بعد سوبرمان" من سلسة فانتازيا لأحمد خالد توفيق ، بيتخيل الكاتب الحياة في أمريكا بعد مقتل سوبرمان على يد مجرد مجنون هو لوثر.استولى لوثر على الحكم في أمريكا ، وخلى الجريمة هي القانون .

"الغريب انه بعد ما مات سوبرمان – لم يعد لسنترال بارك ذات البريق القديم المثير .. فتحت حكم لوثر وعصابة المجرمين والقتلة التي تمثل سلطته التشريعية؛ صارت الجريمة هي القانون والقتل هو القاعدة .. وبالتالي غدا على من يحب أن مخالفة القانون أن يصير شريفا.

الجزء ده بيتطابق تماما مع مصر دلوقتي .. بقت الجريمة هي القانون ، لأن بتحكمها عصابة زي عصابة لوثر بالظبط. شايفة بقى واحد عبقري بيبص يقول" اوبااااااا قصدها ايه بسوبرمان ..أكيد قصدها عبدالناصر"، ومن موقعي هنا أحب أقوله لأ يا فقيق ، أنا لا قصدي عبدالناصر ولا بتاع، لأن الراجل رغم انه فيه حاجات كويسة ، هو اللي خلا البلد بلد عسكر. يعني لما تسمعهم بيغنوا في الفيلم الراقي جدا عسكر في المعسر" عظيمة يا مصر ، يا أرض اللوا " متفتكرش انهم قصدهم على ارض اللوا بتاعة بولاق ، لأ الأغنية أعمق من كده بكتير .. المقصود إن مصر بقت فعلا أرض اللوا ، أو الشرطة عموما ، غير كده يبقى أنت ابن ستين في سبعين وملكش أي حق في حياة كريمة.
زي ما الجزيرة كده بتساهم في صنع الأحداث ، الشرطة المصرية كمان بتساهم في صنع الحدث .. بقت هي اللي بتخالف كل القوانين ، وبقى الدور الوحيد للشرطة إنها تكون حرس خاص للناس الكبار ، لكن السبعين مليون مواطن ملهمش حتى حق إنها تحمي أرواحهم وممتلكاتهم ، مش بتكلم على حرية وديموقراطية هنا ..أنا بس بتكلم على حماية الروح والممتلكات يعني أضعف الإيمان . زي مثلا موضوع سفاح المعادي اللي مش عارفين يمسكوه لغاية دلوقتي ( طبعا بفرض ان الأقوال اللي بتقول انهم عارفينه بس سايبينه يعمل جو وزيطة مش صحيحة).
الناس اللي بيطلع عين أبوها في المواصلات علشان تروح جامعتها وأشغالها ، تفضل واقفة على الموقف بالساعات على ما ترضى مواصلة تقفلها، لكن العادي جدا برضه انهم ميلاقوش ولا مكروباص يركبوه علشان في لجنة مرورية . يعني ايه دور اللجنة هنا؟ انها تقطع عيش السواقين في اليوم ده ، وتخلي الموظفين والطلبة ميوصلوش مصالحهم ..وطبعا مش بعيد لو واحد موظف ياخد خصم كام يوم معتبرين. وطبعا الغرض الأساسي من اللجنة هو فرض الإتاوة على السواقين. يعني حتى شرطة المرور شبه اخواتها .. نفس الانحطاط.
كل مهنة فيها الصالح والطالح، لكن الشرطة فيها الطالح بس ، الشاب بيبقى من عيلة محترمة وعندها أخلاق لغاية ما يخلص الثانوية ويقرروا يدخلوه الشرطة علشان يبقى ليهم ضهر ، ياخدوه في كلية الشرطة يضربوه علشان يعلمو انه يضرب ويشتموه علشا يعلموه انه يشتم ، لغاية ما يوصلوه لأكتر درجات الانحطاط الأخلاقي ساعتها يبقى اتخرج بامتياز.
رغم كده بقى وجود شرطي ضروري في كل عيلة علشان يعرفوا ياخدوا حقهم ، وهو برضه مش بيعمل الخدمات دي ببلاش..كله بحسابه.

إنتى بنت .. طب ما أنا عارفة

2007-01-27T00:56:00.000-08:00

انتى نسيتى نفسك ؟
انتى بنت

و هو بنت يعنى إيه ؟
.
.

من أكتر الحاجات
اللى ممكن تضايقنى او تنرفزنى
إن حد يجاوب على سؤال
أو حله لمناقشة يكون متلخص
فى جملة من كلمتين
إنتى بنت
بغض النظر بقى عن
قضية المساواة
أو حقوق المرأة
أو أى تفرقة
أو تعريف لمجتمعنا
بإنه ذكورى معظم الأحوال
كلامى هنا فى المطلق
يعنى مش بدافع عن قضية معينه
من خلال البوست ده
فى ناس كده تلاقى الحل الوحيد اللى عندها
لقفل نقاش هو انك بنت
يعنى عايزة تروحى حفلة لوحدك ازاى
انتى بنت
عايزة تعيشى لوحدك ازاى
انتى بنت
عايزة تسافرى تشتغلى بره ازاى
انتى بنت
عايزة تقعدى من غير جواز
ياداهية دقى
انتى بنت
عايزة تكتفى بنفسك
فى مرحلة معينه من حياتك ازاى
حضرتك بنت
كانك بتخرق ناموس الكون
مين قال ان فى خط مرسوم للبنت
مينفعش تشذ عنه
يعنى اعرف اتقبل وجهة نظر حد محترم دماغى
و بيقنعنى برأية
مش حد مصمم يقوللى انتى بنت
انتى بنت
انتى بنت
طب ما أنا عارفه
و عارفه انى مش بسئ لأهلى
و لا لدينى قبل كل شئ
و لا لنفسى
يبقى الغلط فين
اننا صحينا من النوم
لقينا اللى قبلنا بيعملوا كذا
فاحنا عيب علينا لو معملناش زيهم
أكيد لا
صحيح الموضوع ده مش على طول بصطدم بيه
و خلاص بقيت اعرف ارد على اى حد بيواجهنى بحقيقة
انى بنت
علشان يفوقنى
مع انى شايفه نفسى بجد
مش بطالب بحقوق غير منطقيه مثلا
و أكتر ما يستفزنى فى الموضوع
لما يكون اللى بيحاول يرجعنى للصواب
حد ملوش علاقة بيا
و مش مكتفى انى محترمة رأيه و خلصنا
لا ده عايز يشربهولى
بس بقيت اعرف ازاى اختار
النس اللى احب اتشارك معاها اطراف الحوار
الناس اللى تختلف معايا
بس كلانا محترم وجهة نظر التانى
رغم ان كلمة انتى بنت بقالى كتير ما سمعتهاش
بس حسيت انى عايزة اكتب البوست
علشان افضح رؤى أفقية
محددة بأسوار من وهم
و مش قصد الكلام
ان اللى رأيه غير رأيى
عليه اللعنة

يعنى عادى جدا

ساعات بكون غلط

و اللى قدامى هو اللى صح
بس اسلوب النقاش يفرق
و الأدلة اللى بيعرضها انسان فى مناقشه
بتكون ادله متموجه
قابله للشد و الجذب
مش مانشيت صحفى

يعنى اقنعنى

ولامؤاخذة

مش بانى بنت طبعا

لكن بانى مينفعش اعمل الحاجه دى لسبب

منطقى

مفهوم مش محفوظ
يعنى مينفعش اعمل الحاجه

لانها تضرنى كانسانه

و تسئ لصورة انا بحترمها فى شخصى

مش علشان انا بنت

فعيب و مايصحش

دليلك لتقضية أحلى موسم امتحانات في الدنيا

2007-01-22T17:38:00.000-08:00

رغم إن موسم الامتحانات بيلفظ أنفاسه الأخيرة ده إن مراحش للرفيق الأعلى خلاص عند بعض الناس،إلا إني اكتشفت إن الموسم اللعين -في نظر البعض إن مكنش الكل-ده ليه فوايد،آه والله فوايد،وبحسبة بسيطة على الكالكيوليتور(نظراً لأن علاقتي مع الرياضيات بعافية حبتين) لقيتهم بالظبط 7 فوايد بالتمامي والكمال ولأني بتكلم من منطلق اشتراكي بحت قلت أقولكم عليهم ينوبني ثواب وخلاص:ـ

أولاً:موسم الامتحانات أعظم فرصة على الإطلاق للنوم،ولا نوم أهل الكهف كدة،أول ما يبدأ الشهر اللي قبل الامتحان تلاقيك بتنام بالعشرين ساعة وبتصحى ساعتين علشان ترجع تنام تاني كنوع من التغيير يعني،والحجة الجاهزة:امتحانات والواحد بيعوض في النوم عشان يعرف يذاكر

ثانياً:الامتحانات فرصة هايلة لهواة الاكتئاب والسوداويين لممارسة هوايتهم المفضلة في الاكتئاب والاكئاب في نفس الوقت.لو حد سألك مالك؟متسيبهوش إلا وهو متأكد إنك ساقط ساقط وإن مستقبلك ذهب مع الريح بلا رجعة وإنك"مفقود مفقود مفقود" ياولدي، ومتقلقش براحتك أوي في العياط لو عايز واللطم كمان مفيش مانع

...

ثالثاً:لو طبقت القاعدة اللي فاتت باحترافية هتلاقي القاعدة التالتة هلت عليك بفوايدها،بما انك هتعيش دور المكتئب المخنوق اللي مش طايق نفسه ولا حياته ساعتها ممكن تتسرب من البيت كل يوم باليل بحجة إنك متضايق ومحتاج تشم هوا بعيد عن الكتب والبيت والمذاكرة أو ترجع برضو للفايدة رقم واحد،عندك أوبشنز كتير هيص ياعم براحتك دي امتحانااااات

....

رابعاً:وانطلاقا من القاعدة التالتة ممكن تستهلك حجة إنك مش فاهم حاجة في المادة وعايز تذاكر مع اصحابك،وقتها بقى ممكن تعيشوا براحتكوا على أي قهوة أو مول،ولو الأمور متظبطتش ابقوا برروا حكاية المول دي إن عندكم مادة مقررة اسمها علم الاجتماع في ظروف مواتية للتواصل مع قوى الشعب،طبعا الظروف دي عبارة عن السجاير أو وجود النصف الثاني من المجتمع

.....

خامساً:عندك نت؟حلو أوي،الامتحانات بتهيأ لك الفرصة عشان تستخدم جملة"بجيب حاجات للمادة من على النت"كل ما تحب تقعد عليه بس خلي بالك لازم تكون منطقي ومقنع لأن مفيش حد بيقعد ست سبع ساعات بيجيب ف صفحتين من النت،الأهالي مبقوش طيبين وبيصدقوا الحاجات دي زي زمان للأسف

......

سادساً:الامتحانات بتتيح لك الفرصة تعيش حياة بوهيمية خالصة،ولمناهضي النضافة ممكن تستعبط وتسيب فروتك..شعرك يعني زي ماهو من غير حلاقة بحجة إنك معندكش وقت تسرحه والتفاهات دي،أو تطلق لدقنك العنان وأهو بالمرة بتدي منظر وقور قال يعني الواد طاحن نفسه في المذاكرة وهلكان ياحبة عيني0

أما لهواة ترييح الجمجمة ممكن تروح تجيب شعرك ع الزيرو بحجة برضو إنك مش فاضيله،بكدة هتوفر تمن كيلو الجيل اللي بتنقع شعرك بيه كل مرة وانت نازل الشارع0

.......

سابعاً:مخك شغال طول السنة زي النحلة في التفكير،بمعنى انك بتفكر في كل حاجة إلا الدراسة ولا تقلق خااالص في الامتحانات مش هتلاقي وقت تهرش أصلاً،يعني لا هتفكر في البت اللي سابتك ولا الواد صاحبك الندل،ولا انتي هتفكري في العريس اللي مبيجيش وعلانة اللي اتجوزت قبليكي مع انك احلى منها

.......

شفتوا بقى ان انتوا اللي بتتبطروا ع النعمة وتقعدوا تلعنوا في ايام الامتحانات وسنين الامتحانات و الكلية والدراسة والعيش والعيشة واللي عايشينها؟انا متأكدة ان موسم الامتحانات اللي جاي هتحسوا بقيمة امتحاناتكم وتقولوا ياريت السنة كلها امتحانات،وعلى رأي المثل اللي بيقول"ياناكر خيري بكرة تشوف زمني من زمن غيري"بكرة اما تتخرجوا هتحسوا بالضياع والوحدة من غير الامتحانات دي

ملحوظة:الكاتبة مش مسؤولة عن نتائج الموضوع،آه معلش العمر مش بعزقة يعني0
فوتتكم بعافية بقى
زيووووو

Just an idea

2007-01-14T05:22:00.000-08:00

عندى فكرة

إيه رأيكم نعمل خطة زمنية لهدف بعد هدف

علشان يكون حافز لينا

أكيد عندنا أحلام كتير

كل واحدة أو واحد معدى

يقول أول هدف جاى ليه

و يحددله مده زمنية

ملناش دعوة بخطط الحكومة الحمصية

و بعدين لما الوقت يخلص

ييجى يبشرنا بانه أنجزه فعلاً

و أدينا بنساعد بعض بأحلامنا

ها حلوة الفكرة دى

و للا ملتوته

؟!!

بيعطيك جوانيح

2007-01-03T03:26:00.000-08:00

البوست دا عن امنيتي في عام2007 و ربنا يسهل و تتحقق
طبعا هو البوست اتأخر كام يوم بس دا نظرا لاني عيانة اوي دا اولا
و ثانيا علي بال ما خلصت شغل في البنوتة اللي فوق دي
....المهم
بتمنى بتمنى ,, ان السنة دي يطلع لي جناحين
مش كتير على ربنا
ثم انا نفسي اوي يطلع لي جناحين
و اطير و ارفرف في الفضا علي رأي وردة
.
.
كنت زمان دايما اقول لنفسي جملة
only love can set you free
بس دلوقتي حاسة ان الحب مدانيش الجناحين اللي نفسي فيهم
طبعا دا مش بطر علي النعمة
يعني الحب دا نعمة كبيرة اوي ربنا بينعم بيها على قلوبنا
اننا نعيش علي الارض بالمحبة ،، بالود و التراحم ،، بالعطف بالإيثار، بالشفقة و الرحمة
و كل المعاني الجميلة اللي تحت قيمة الحب
....لكن برده
يمكن التجرد بأة هو اللي ممكن يوصلني للجناحين
يعني ان يبقي الواحد متعلق بربنا اوي اكتر من اي شيء تاني
و انا للأسف لسة بعيدة عن المرحلة دي
و إن كنت بتمنى مكونش بعيدة أوي
.
.
المشكلة الحقيقية هي اني متأكدة انه كان عندي جناحين
يقين غريب جوايا ،، او زي ما يكون ذكريات مدفونة
يمكن كنت في حياة اخرى فراشة؟
أو جايز كان عندي جناحات و لما اتكسرت حصلت لي صدمة افقدتني الذاكرة
المهم اني متأكدة انه كان عندي جناحين
بس راحوا فين؟
حسب نظرية من نظريات التطور ان العضو الذي لا يستخدم يضمر
يكونوش حصلهم كدا ؟
احيانا بفكر اني يمكن كنت فعلا فراشة
و بعدين حد شرير ألقى عليا سحر و خلاني بني آدماية
ازاي بقى نفك السحر دا .. هو دا السؤال
.
.
المهم انا مليش دعوة انا عاوزة جناحين
عاوزة اطير
المس النسمة الباردة اللي فوق
العب بالسحاب اللي عامل زي غزل البنات
اطير فوق الغيطان الخضرا
فوق البحر
فوق الصحرا
انا عاوزة اطير بعيد
.
.

زيي زي أي فراشة
يا رب

كـــل سنة واحنــا مش معقوليين

2006-12-31T01:37:00.000-08:00

ازيكو يا بنات

كل سنة واحنا طيبيين

ده اول عيد يمر على تجمعنا ..وان شاء الله ييعدى علينا اعياد كتير كتير واحنا مع بعض وفاضيين اكتر للامعقوليزمنا

يارب كل واحده فينا تحقق كل امانيها و تغطى السعادة على حياتها لحد ماتكتم على انفاس اللى يكرهووها قولوا امييين

كل واحده تسيب الورد بتاعى هنا بدل ماجى اتخانق معاكو .. ونقلبها شكلة علنى قدام الخلق :]

فييييييين الورد ؟؟

المعارضة في مصر...عايزالها معارضة

2006-12-19T16:14:00.000-08:00

النظام مش ديموقراطي..معروفة دي
توابع السطر اللي فوق ده
معروفة أكتر
طبيعي بعدها يكون فيه معارضة
محدش قال حاجة يعني
بس اللي حاصل دلوقتي فضيحة
آه والله فضيحة
معظم جرايد المعارضة في مصر اتحولت لغتها من نقد للنظام
إلى نقد شخصي
ومش بس على المستوى العام للنظام والقائمين عليه
و إنما على المستوى الخاص
للدرجة اللي توّصل جرايد من المفترض انها محترمة
إلى إنها تهاجم بعض الناس في شخصياتهم أو عائلاتهم
وده طبعا ملوش أي علاقة بالنقد
لا النقد البناء ولا الهدام حتى يقولوا كدة
المفروض إن الصحفي المحترم لما يحب يكتب أو يعارض
فهو ينتقد النظام وطريقة تطبيقه،الموضوعية بتقول كدة
دون النظر بقى لأي اعتبارات شخصية لأي حد
يعني مثال
مينفعش أكتب مقال في جريدة ما مشهورة وتبدو إنها محترمة
وأنتقد شخص الوزير بدل ما انتقد أدائه لمهامه
ببساطة
لأن شخصه ميهمنيش في أي شيء كمواطن
اللي يهمني
هل بيقوم بواجباته كوزير أم لا
غير كدة هو حر يكون زي ما يكون طالما ده مش هيأثر على أدائه المهني
ونقيس على كدة بقى كل فرد في كل المواقع
بداية من رئيس الجمهورية ولحد أصغر مسئول
و النقطة التانية
واللي خليتني أبطل أشتري الجريدة اللي كنت متابعاها
هي تحول لغتها من النقد إلى الاهانة الصريحة
ومن الطبيعي إني مش بروح أشتري جريدة علشان أقرا شوية شتايم
طب ما انا اروح اقعد على اي قهوة واسمع الناس طول النهار بتشتم وبتسب في البلد وحالها المايل بقى
وإلا يبقى ايه الفرق بين الصحافة والشارع العادي؟
وايه هي مهمة الصحافة المعارضة بالظبط دلوقتي؟

آخر نقطة متعلقة بالمعارضة في حد ذاتها
الأحزاب مفقودة أو بمعنى أصح مغيبة في صراعاتها الشخصية
أو بتحارب أحزاب أخرى بتواجه نفس المشكلة
وهي التهميش
وحركات التغيير نشاطها محدود ومقتصر على أعضائها
حتى حركة كفاية اللي كان معقود عليها الأمل
انشق 7 من أبرز أعضائها
و جرايد الحكومة ما صدقت ونشرت الخبر وكأنهم بيثبتوا للشعب المصري أكتر
إن مفيش حركة معارضة عدلة في مصر
وإن المعارضة المصرية مش موجودة أساساً
و في نفس الوقت أبص على الإخوان المسلمين
رغم إختلافي الشديد معاهم في حاجات كتير
إلا إن قوتهم في مصر لا يستهان بها
وأكتشف إن قوتهم بتوجه في الاتجاه الغلط
وعندهم-زي المعارضة المصرية-غباء سياسي من الدرجة الأولى
غباء من النوع اللي بيسمح للحكومة إنها تستغله لأقصى درجة
وبين كل ده
المواطن المصري العادي
اللي لا هو في صف الحكومة
ولا لاقي صف تاني يتحامى فيه
محتار مش عارف يعمل ايه
الحاجة الوحيدة اللي متأكد منها
إن مصر دولة عربية خالصة
وإن زي ما درس في التاريخ بالظبط
العرب اتفقوا على ألا يتفقوا
ويبدو إننا هنحتاج معارضة وارد الخارج
بضمان 25 سنة أدام!ـ
__________________

أنا عارفة إني رغيت بس أنا لسة مخفتش من مرض الاعتراض على الحاجات اللي متتعقلش

دعواتكم بالشفا ليا

يللا نتجوز

2006-12-18T22:27:00.000-08:00

عندك استعداد تتجوز \ تتجوزى جواز صالونات ؟

الاختيارات و لامؤاخذة

أيوة انتى بس قولى يارب
عادى ليه لا
معتقدش
لا طبعا
مش عارفة

فكر كويس و بعد ما تختار
قول ليه
بس خلاص

نكتة قديمة

2006-12-18T01:22:00.000-08:00

فى اجتماع المحلس العالمى لحقوق المرأة ... اتفقوا ان كل واحدة تروح ما تعملش حاجة فى البيت و يجتمعوا تانى بعد أسبوع كل واحدة تحكى اللى حصل

بعد أسبوع

الإنجليزية قالت : أنا رحت لمايكل و قلتله بص من هنا و رايح انا مش هاعمل أى حاجة فى البيت لا هاكوى و لا هاطبخ و لا هانضف عايز تعمل حاجة اعملها بنفسك ، أول يوم ما شفتش حاجة ، تانى يوم ما شفتش حاجة ، تالت يوم لقيته جايب ورد و قالى أنا آسف يا حبيبتى أنا عرفت قد إيه انتى بتتعبى و من هنا و رايح لو عزتى أى حاجة قولى و أنا اعملها

الفرنسية قال : انا رحت لجون و قلتله من هنا و رايح انا مش هاعمل حاجة لا هاغسل و لا اخيط الهدوم و لا انضف عايز تعمل حاجة اعملها بنفسك ، أول يوم ما شفتش حاجة ، تانى يوم ما شفتش حاجة ، تالت يوم لقيته جايب ورد و بيقولى يا حبيبتى أنا عرفت قد إيه انتى بتتعبى من هنا و رايح شغل البيت النص بالنص

المصرية قالت : انا رحت لسى السيد و قلتله بص بقى من هنا و رايح انا مش هاعمل حاجة لا هامسح و لا هاغسل و لا هاطبخ ... عايز تعمل حاجة اعملها بنفسك ، اول يوم ما شفتش حاجة ، تانى يوم ما شفتش حاجة ، تالت يوم بدأت أشوف شوية بعينى الشمال

انج بسعادتك

2006-12-06T11:48:00.000-08:00

عندما تغزو الابتسامة وجهك، تجد علامات الاستفهام قد غزت وجوه الاخرين.
" أنت بتبتسم.. هزلت"
" جاوب على قد السؤال.. فرحان ليه"
كأنهم يستكترونها عليك. فكيف تسول لك نفسك الابتسام بينما هو لا يستطيع دفع الايجار وهي رسبت في الكلية وهم لا يأكلون اللحم..
أعليك الالتفات الى مشاكلهم، أو البكاء لبكائهم أم العناية بفرحك الخاص الذي - حتما- لن يدوم طويلا في بلد كتلك؟
هنا لا نجد الفرح طويلا، لذا علينا استغلال كل لحظة ..
لا يتوجب عليك أن تلوم نفسك لمشاكلهم ، طالما لست سببا فيها. كما أن الحياة أقصر من تحل مشاكل الجميع.
المشكلة الكبرى هي أنك لا تتورع عن أن تلوم نفسك كلما رأيت الحزن في نظراتهم. رغم أن أحدا لم يلم نفسه لأجلك من قبل.
تلوم نفسك ثم تتخذ موقعا دفاعيا تجاه تلك النفس الخبيثة التي تصر على الحزن فتتظاهر بالحزن.تبدأ بالتظاهر أمام الناس حتى تصدق تظاهرك فيصبح حقيقة. أنت فعلا تعيس الان.
والنتيجة؟ لم تصبح حياتهم أفضل، أنت لم تحل مشاكلهم.. فقط أضفت تعيس اخر الى القائمة.وعندما يراك أنسان سعيد فأنه سيكمل الدائرة. لنصبح قوما لا يعرف السعادة.

حافظ على جمال شعورك ، حاول أن تجعلهم يشاركوك.. ولكن ان فشلت لا تشاركهم أنت.
فقط انج بسعادتك.

التوورلوب .. قراءة في ما بعد أحداث التحرش

2006-11-28T11:02:00.000-08:00

محدش يقولي ايه العنوان المكلكع دا ،، لانه اساسا العنوان كان في الأصل التوورلوب قراءة في ما بعد أحداث التحرش .. شيء من الفذلكة و بعض الأشياء الأخري
و دا لأني ناوية اتفذلك في هذا الموضوع
يعني هي الحياة ايه غير شوية فذلكة ... و الفذلكة لمن لا يعلم هي الوجه الآخر للفلسفة بس بالنسبة للناس اللي ملهاش في الفلسفة
يعني لما تحب في بعض الاحيان تتفلسف لمزيد من التحليل و فهم الأمور تلاقي واحد جه فجأة متعرفش طالعلك منين يقولك " و النبي يا سيد مش عاوزين فذلكة "ه
اييييييييه ... المهم

طبعا موضوع التحرشات اللي حصلت في وسط البلد قُتل تدوينا و كل اللي رايح و اللي جاي أدلى بدلوه فيه
بس مش عارفة اذا كان حد أخد باله زيي كدا ان كان فيه حاجة ناقصة في المشهد السيريالي اللي كان حاصل في وسط البلد و لا لأ
يعني لو تلاحظوا المشهد كان مقتصر علي صنفين من الناس
صنف بيتحرش .. ،، و صنف بيتم التحرش به
!! ..الصنف التالت بأة فين
و علي رأي برعي سنجة في مقولته الخالدة " يا منطقة مفيهاش راجل"ه
و محدش يقولي برده دا سواق التاكسي دخل بنت و قفل عليها و لا اصحاب المحلات حموا كذا بنت و قفلوا الابواب .. دا رد فعل سلبي اوي يعني .. زيهم زي الناس اللي كانت واقفة بعيد تضرب كف علي كف و تقول لا اله إلا الله و لا حول و لا قوة إلا بالله زي ما يكونوا بيتفرجوا ع المذابح الاسرائلية في فلسطين على القناة الأولى
لا و فيه ناس تانية برده كانوا واقفين بعيد برده بيحذروا البنات يروحوا عند الناس الشريرين اللي هناك
و كان هناك برده ناس بتصوررررررر .. انا طبعا مش معترضة ع الناس اللي صورت و فضحت اللي حصل
بس يعني مش بعد ما صورنا مش نعمل حاجة بأة و لا انتو هتفضلوا تصوروا علي طول يعني و لا ايه؟
ثم اساسا اصحاب المحلات اللي مالية وسط البلد كانوا فين من دا كله ،، و لا هما كمان كانوا بيقولوا زي واحد قريتله كومنت كدا آل بيقول انا مش هقف ادام عشرة محششين و لا معاهم مطاوي
لا يا شييييييخ امال حضرتك ناوي تقف و لا مؤاخذة يعني امتي بالظبط !! .. لما يجردوهم الاول من اسلحتهم ( و من ملابسهم بالمرة) و لا ايه؟
يعني انا نفسي اسأل هذا الشيء لما تبقى ماشي مع أختك و تلاقيها بتتشد و ناس بتشد في هدومها و تلمس جسمها هو مش الطبيعي انك تدافع عنها انشالله تموت
لا و واحد تاني بيقول ان الشباب كمان البنات بيتحرشوا بيهم و ان واحدة مرة اتحرشت بيه في اتوبيس بس هو خاف يتكلم احسن ينضرب و الناس متصدقش (فسابها يا حرام تتحرش).....؟!!؟
هو انا طبعا مصدقة ان دا ممكن يحصل .. انما يعني خاف يقول دي زيها زي خاف يدافع بالظبط
و بعدين يا عم صلي ع النبي في قلبك كدا ما الناس كانت مالية وسط البلد و لا حد عمل حاجة ،، يعني انت لو كنت قلت كان محدش برده هيعمل حاجة
ما هي أصل السلبية دي زي الامراض المعدية تمام
واضح اننا ينقصنا روح المقاومة الشعبية .. عارفين زي ما الناس كانت بتطلع بايد الهون و المقشات و غطيان الحلل حتي،،، المهم انها مقاومة للنفس الاخير
و بعدين ما الدفاع عن الارض زي الدفاع عن العرض بالظبط
و زمان قالوها .." الارض عرض يا ولدي "
مش عارفة الناس في بلدنا جرالهم ايه ..!! .. خلاص الشهامة و الجدعنة بقت مع الديناصورات المنقرضة
((((((((((((((((((((((((( تنهيــــــــــــــــــــــــــــــــــــــــــــــدة ))))))))))))))))))))
الخلاصة بعد كل هذا الرغي انا قرأت ان فيه حملة حاليا اسمها : " اتكلموا" طبعا انا مش ضدها علي الإطلاق
ولكن انا شايفة اننا المفروض نشتغل علي محورين
و نعمل حملة تانية متوازية مع حملة اتكلموا و نسميها حملة الــ " تورلووب"
اي نعم التوورلوب ...
فاكرين الفيلم بتاع محمود عبد العزيز و نور الشريف لما كان مش بيخلف و حسين فهمي شار عليه انه ياخد حتة من الانترنال لووب من محمود عبد العزيز اللي في نهاية اتهبل و كان ماشي بيقول عاوز تورلوب علي أدي اقطّع فيه ما يخلصشي
آهو احنا هنعمل حملة تورلوب لكل مواطن .. بس تورلوب من نوع تاني
علشان بفرض ان المتحرشين دول فئة ميئوس منها علي حسب ما سمعت و عندهم اسهال مزمن في السلوكيات
فإحنا هنسيبنا منهم خااااالص علي اساس يعني انه طالما ال 48 ساعة اللي جايين عدوا فيبقي مفيش أمل
و بإذن الله كدا هنشتغل ع اللي باقيين اللي هما بيشوفوا هذا المشهد و إتس اوكي معاهم و كدا
طبعا هو فيه اقتراح اننا نمشي نقفّش فيهم .. بس احتمال بتوع حقوق الانسان ميسيبوناش في حالنا
فــ إحنا ممكن نحول هذه الحملة إلي مشروع قومي من ضمن خطة العبوووون إلي المستقبل المبهررررر
و نسميه مشروع التورلوب برده
و نبتدي ناخد الجيل الجديد بأة .. بس بنظام يا حضرات
هنعمل شريحة حلوة كدا تتزرع في المخيخ زي ما بنشوف في الافلام الاجنبي اللي لحست مخنا ( في فيلم لروبن ويليمز ناسية اسمه دلوقتي كان فيه حاجة شبه كدا)
المهم الشريحة دي هتتزرع من ضمن اجراءات استخراج بطاقة الرقم القومي .. يعني اي حد هيروح المصلحة يخلص ورقه لازم يركب الشريحة علشان تستكمل اجراءاته و يبقي عنده بطاقة ..
و الشريحة دي هتقوم بعمل مهم خاااااااااااالص
و هو انه الحلو دا اللي زي الباب لما يكون ماشي في الشارع و يشوف حد بيتعرض لبنت باللفظ او الفعل تقوم الشريحة ترفع مستوى الادرينالين ع الرابع و تشغل المساحات و يلاقي صوت من الداخل بيقوله انت تسبح في بحر الظلماااااا.... آآآآ قصدي هيقوله اتحرك يا لوح مش شايف واحدة زي اختك أو أمك أو مراتك أو خطيبتك واحد بيضايقها .. يقووووم الدم يضرب في النافوخ و يبتدي ياخد رد فعل .. و مش بعيد يحرك أطرافه الاربعة في آن واحد
طبعا الشريحة دي ممكن شحنها يخلص و لذلك هيتصرف معاها شاحن و احتمال هاند فري برده
و هتقولولي طب ما فيه ناس ممكن تركبها و بعد كدا تبطل تشحنها .. هقولكم لااااااااااااااااا ما هو اللي هيفصل شحن هيبقي واضح لكل الناس دا غير انه هيبقي مذبهل كدا و ترتسم علي وجهه تعبيرات هلامية غير محددة التفسير

" Battery low" كمان هيبقي ماشي في الشارع مفضوح بسبب صوت بيب بيب بتاع الــ

و طبعا يجب ان يتم توقيفه بواسطة شرطة المسطحات المائية .. مش بقولكم عبووووون .. مراكب بأة و حركات
طبعا دا اقتراح وجيه جدا لإعادة شحن الرجولة شبه المنقرضة
و احتمال ناخد تصويت ع الموضوع دا
و اللي مش عاجبه برده ممكن يشجب بأقوي العبارات مفيش مشاكل
و اللي عاوز شريحة اتنين تلاتة لحبايبه مفيش مشكلة برده
اول ما نتفق فيهم هنبتدي خدمة الديليفري .. و هنحط نمر تليفونات و اعلانات و كل حاجة
اهم حاجة كله يحضر العوامات علشان العبووووووووووووووون
و دمتم... :D

عمرك شوفت استقرار علاقة بيوجع ؟

2006-11-21T03:38:00.000-08:00

لقيت محدش عايز ينزل مواضيع

قلت استفتح انا بقى

نهارنا نادى بإذن الله

الموضوع بسيط جدا

العلاقات الإنسانية من زاوية معينة

ألا وهى

بداية العلاقات

المنطقى إننا طول ما إحنا عايشين بنعمل علاقات جديدة مع بشر جداد علاقات صداقة بقى و للا زمالة

و للا أخوة و للا حتى حب كله موجود و كل علاقة و ليها كيانها و أسلوبها لكن الفكرة هنا هى بداية العلاقة مع الطرف الثانى

غالبا البدايات متشابهة بتلاقى نفسك فى علاقة جديدة مع حد و عايز تعرف كل حاجة عنه و هو يعرف كل حاجة عنك بتبقى عايز تشده يمكن . عايز تبين احسن حاجة فيك علشان يتشد مش قصدك تغش لكن عايز تحط اول طوبة . حد هيقولى بس كده الأساس ده باطل هقوله يمكن .. فى ناس تانية بتبقى عايزة تبان على حقيقتها أوى علشان العلاقة تتبنى صح و عل نور و دول مش كتير مش قصدى ان الناس بتمثل لكن بتبين الحلو اللى فيها الأول و بتتساهل فى الرأى من غير تعنت و إصرار

نيجى تانى لأول العلاقة بتلاقى الاهتمام غالبا مكثّف و شديد ربما هو فضول أول قطفة او ان كل غربال و له شدة بس فجأة بعد ما بتشبع فضولك او العلاقة توصل لمرحلة مستقرة بتلاقى تصرفات مختلفة قد تراها فتور و قد تراها ان ده شئ منطقى جدا و طبيعى جدا ماهو كل

curve

بيبدأ من الصفر و يطلع لحد

optimum point

و بعدين يفضل مستقر شوية و دى المرحلة اللى بتحس فيها بالزلزال و تقول هو فى ايه

ناس كتير مش بتدرك ان ده امر طبيعى جدا و انهم دلوقتى المفروض فى افضل مرحلة فى العلاقة لان المنحنى معرض للتناقص من تانى بتلاقى نفسك فجاة بتلعن كل اللى يعرفوا الطرف التانى اللى معاك فى العلاقة و بتقول ده غشنى بقى و احنا اصحاب يكون بيعاملنى كده و لكن لما كنا مش صحاب كان بيبقى مهتم بيا و تحس ان صنم او تمثال الطرف التانى اتكسر مليون حتة الموضوع هنا مقسوم شقين لازم نوضحهم الاول

أول شق

ان ده ممكن يكون تطور طبيعى لمنحنى العلاقة زى ما شرحت و ساعتها هيكون دى حاجة بتحصلنا كلنا

و لازم نوضح ان التغيير بيكون مش جذرى تماما و بيكون تدريجى و الانسان بيعرف فعلا انه فى مرحلة مستقرة من خلال المواقف اللى بتحصل و بتأكد ثبوت العلاقة او اهتزازها

ثانى شق

ان ممكن انسان فعلا يكون كان كويس لكن فجاة اتغير لسبب او لآخر ساعتها بتكون دى علاقة بدأت تنهدم و كتير بتتخيل انك هتصاحب ناس او هتتفق معاهم لكن بتلاقى لا احنا مجرد زمايل و العلاقة مش بتنتهى بالظبط لكن بتقف عند مرحلة اولية غير المتوقعة و ده اللى بيسبب خيبة امل احيانا خصوصا لما يكون التوقف ده من جانب واحد و بس

بالنسبة لى مشكلتى الأولى كانت انى بتعب قوى لما العلاقة بتستقر مش علشان انا خايفه بالظبط لكن لانى مستوى اهتمامى باللى معايا مش بيتغير و ببدأ أشك أو أقلق لانى متوقعة المثل من اللى قدامى بعد طول عناء اكتشفت السبب

واللى هو ان كل شخص عايز ياخد بنفس الطريقة اللى بيدى بيها بغض النظر عن النسبة و التناسب

يعنى لو انا بحب القراية مثلا و احب اللى يحبنى يجيبلى كتاب هدية هلاقينى بهادى اللى بحبه بنفس الشئ

رغم انه ممكن يكون بالنسبه له كلمة حلوة احسن كتيروده اللى بيبوظ علاقات كتير لان الواحد لازم يدى اللى قدامه اللى هو بيحبه مش اللى هونفسه بيحبه

كان فى جملة بتعبر عن نفس الفكرة بس من الناحية التانية

كانت بتقول

حارب عدوك بالسلاح الذى يخشاه لا بالسلاح الذى تخشاه انت

الفكرة هنا واحدة تقريبا

لازم نفهم ان ممكن انسان يكون عقلانى فانه يدينى ميسد كول بيساوى عندى انى اقعد افكر فيه 3 ايام متواصل لانى مثلا رومانسية

و ده ما يعيبوش و لا يعيبنى

زى النباتات بالظبط الصبار ممكن يعيش فى الصحراء و فى نباتات تانية لو ما سقيتهاش كل شوية تموت فكرة ان كل ميسر لما خلق له و الطبيعة البشرية مش ثابتة

بس انك تفهم حاجة و انك تتقبل الموضوع حاجة تانيه خالص

افتكر انتيمتى لما اتعرفت عليها فى اول مكالمة تليفونية بيننا لما حسينا اننا هنبقى اصحاب بجد قالتلى بصى عايزة اقولك حاجه انا مش بتاعة ميسدات و لا بتصل كتير و كده علشان ما تفتكرنيش مطنشاكى لكن دى طبيعتى فرحت قوى انها قالتلى علشان ابقى مستوعبة أبعاد شخصيتها من غير ما ده ياثر على حدود علاقتنا

واحد تانى برضه من أأقرب الشخصيات ليا اول ما اتعرفت عليه كان بيكلمنى كل يوم و نتفق على مواعيد نتكلم فيها ع النت لكن لما بقينا اصحاب ووصلنا لمرحلة مستقرة لقيته فجأة بيرن كل 3 او 4 ايام مرة بعيدن بقى كل 10 ايام و دلوقتى مش بيرن خالص و لا بيتصل غير لسبب مهم يمكن فى الاول تعبت جدا و حسيت ان صداقتنا باظت و زعلت و كان رد فعلى مشوش

مش عارفة هل انا كمان ما أسألش عنه و للا اكثف انا اتصالاتى فيتكسف و للا اسأله و للا ما احرجش نفسى يمكن هو شايف ان علاقتنا دى ماتنفعش و هيبدأ ينسحب من الصداقة

فضلت كتير تعبانة فعلا بسبب الموضوع ده و عملت كل الخطوات اللى كنت مترددة بينهم لكن يمكن كانت انجح الخطوات لما سالته على بلاطة و قالى انه مش بيرن و لا بيتصل كتير بالناس لكن ده مايمنعش ان علاقتنا القوية و صداقتنا زى ماهى

ساعتها فهمت و ارتحت شوية بس اللى ضايقنى طب ليه كنت حد تانى فى الاول يعنى انا فى علاقاتى اللى عارفة انها هتطول لما بهتم و اعود حد على قدر معين من الاهتمام مش بيقل سواء انا مشغولة وللا ورايا حاجة و اعتقد فى ناس من اللى هنا فى المدونة يعرفوا كده من ساعة الموضوع ده قررت انى ما اعملش لحد تمثال لان كلنا بشر و كونه غير صورة فى دماغى ده مايعنيش انه انسان سئ لكن معناه ان عادى هو بشر مش عارفة يمكن مش غلطة اللى بنعمله تمثال و يتكسر فيه هو على اد ما هى غلطتنا احنا اننا عملناله تمثال من الأساس فى جملة قريتها فى كتاب قبل كده كانت بتقول

تصدمنا الحقائق المريرة و إذا بأصنامنا تهوى من عليائها حطاما و إذا بنا فجأة ندرك اننا بشر

هى كده ببساطة مطلقة وده يودينا لسؤال تانى خااااااااااااالص

هل الانطباعات الاولى تدوم ؟

على حدود الزمالة غالبا بالنسبة لى الانطباعات الاولى تدوم يعنى لما بحب حد بيطلع حاببنى و لما مش بطيق حد بيكون بالمثل باستثناء علاقة واحدة بزميلة فى الكليه هى اللى كنت مش بحبها و بعدين طلعت انسانه كويسة عادى يعنى

أما على حدود الصداقة فاحيانا الانطباعات الاولى تدوم يكفى انى ااقول انى عندى 5 اصدقاء مقربين جدا3 منهم كان انطباعى الاول عنهم غير مريح بالمرة

اما بقى لو حد كانت علاقتى بيه عديت حدود الصداقة فدول غالبا بيكونوا ناس كنت بكرههم جدا و فجاة بصحى م النوم بشوفهم بعين تانية خالص- فاشلة برضة -هو مفيش وسط باين عندى

علشان كده قررت ما اخدش انطباعات أولى عن اى شخص استنى شوية الاولو فى نفس الوقت ما اصدقش اى انطباع اولى عنى اى حد بيحاول يقوى علاقته بيا فى الأول بيكون فى اهتمام زيادة بتعامل معاه عادى جد - مع الاهتمام - و بقول دى لحظة طيش و هتعدى خلينى مأقلمة نفسى ع المرحلة اللى بعد كده
خلينى عايشة فترة استقرار

curve

العلاقات و ماليش دعوة لا بالطلعة و لا بالنزلة

رغى رغى رغى

يالهوى

المهم من ده كله

إنى طول عمرى كنت بسأل نفسى هل الناس بيعانوا نفس معاناة استقرار العلاقة

و للا كل الناس عندها وعى فطرى و انا بس اللى احتجت وقت لحد ما افهم الموضوع ؟

-----------------
عارفة ان اول موضوع فى المدونة كان المفروض يكسّر الدنيا لكن محدش بدا

قلت اتكلم و أنا و خلاص

sorry

ع الرغى الفظيع ده

إفتتاحية

2006-11-13T05:19:00.000-08:00

بسم الله الرحمن الرحيم
بعد فترة لا بأس بها من اللبخ العالي .. كان لزاما علي و بما اني كبيرة القعدة دي يعني اني اقص الشريط
أتمني تكون المدونة فتحة خير علينا و متكونش مجرد فتحة في السقف تخر علينا
طبعا كان نفسي اجيبلكم دي جي في الافتتاح يغني العنب
لكن حفاظا علي الذوق العام انا وصيت زوبة الكلوباتية تيجي مع فرقة عبده صاجات اذا مكنش لسة في السجن
يللا حاولوا تنتشروا و تكتبوا عن الاشياء التي تحدث حولكم أو بداخلكم أو عند الناس التانيين
دا طبعا بافتراض انكم انتم نفسكم مش الناس التانيين
فين بأة اللي هيبوسوا و فين البنوتة اللي هتديني الورد
و ياريت حد ياخد المقص من ايدي قبل ما ارتكب جريمة
و مبروك مبروك مبروك .. مبروك عليكم و علينا
.
.
و السلام عليكم و رحمة الله و بركاته