Tuesday, November 28, 2006
التوورلوب .. قراءة في ما بعد أحداث التحرش
محدش يقولي ايه العنوان المكلكع دا ،، لانه اساسا العنوان كان في الأصل التوورلوب قراءة في ما بعد أحداث التحرش .. شيء من الفذلكة و بعض الأشياء الأخري
و دا لأني ناوية اتفذلك في هذا الموضوع
يعني هي الحياة ايه غير شوية فذلكة ... و الفذلكة لمن لا يعلم هي الوجه الآخر للفلسفة بس بالنسبة للناس اللي ملهاش في الفلسفة
يعني لما تحب في بعض الاحيان تتفلسف لمزيد من التحليل و فهم الأمور تلاقي واحد جه فجأة متعرفش طالعلك منين يقولك " و النبي يا سيد مش عاوزين فذلكة "ه
اييييييييه ... المهم
طبعا موضوع التحرشات اللي حصلت في وسط البلد قُتل تدوينا و كل اللي رايح و اللي جاي أدلى بدلوه فيه
بس مش عارفة اذا كان حد أخد باله زيي كدا ان كان فيه حاجة ناقصة في المشهد السيريالي اللي كان حاصل في وسط البلد و لا لأ
يعني لو تلاحظوا المشهد كان مقتصر علي صنفين من الناس
صنف بيتحرش .. ،، و صنف بيتم التحرش به
!! ..الصنف التالت بأة فين
و علي رأي برعي سنجة في مقولته الخالدة " يا منطقة مفيهاش راجل"ه
و محدش يقولي برده دا سواق التاكسي دخل بنت و قفل عليها و لا اصحاب المحلات حموا كذا بنت و قفلوا الابواب .. دا رد فعل سلبي اوي يعني .. زيهم زي الناس اللي كانت واقفة بعيد تضرب كف علي كف و تقول لا اله إلا الله و لا حول و لا قوة إلا بالله زي ما يكونوا بيتفرجوا ع المذابح الاسرائلية في فلسطين على القناة الأولى
لا و فيه ناس تانية برده كانوا واقفين بعيد برده بيحذروا البنات يروحوا عند الناس الشريرين اللي هناك
و كان هناك برده ناس بتصوررررررر .. انا طبعا مش معترضة ع الناس اللي صورت و فضحت اللي حصل
بس يعني مش بعد ما صورنا مش نعمل حاجة بأة و لا انتو هتفضلوا تصوروا علي طول يعني و لا ايه؟
ثم اساسا اصحاب المحلات اللي مالية وسط البلد كانوا فين من دا كله ،، و لا هما كمان كانوا بيقولوا زي واحد قريتله كومنت كدا آل بيقول انا مش هقف ادام عشرة محششين و لا معاهم مطاوي
لا يا شييييييخ امال حضرتك ناوي تقف و لا مؤاخذة يعني امتي بالظبط !! .. لما يجردوهم الاول من اسلحتهم ( و من ملابسهم بالمرة) و لا ايه؟
يعني انا نفسي اسأل هذا الشيء لما تبقى ماشي مع أختك و تلاقيها بتتشد و ناس بتشد في هدومها و تلمس جسمها هو مش الطبيعي انك تدافع عنها انشالله تموت
لا و واحد تاني بيقول ان الشباب كمان البنات بيتحرشوا بيهم و ان واحدة مرة اتحرشت بيه في اتوبيس بس هو خاف يتكلم احسن ينضرب و الناس متصدقش (فسابها يا حرام تتحرش).....؟!!؟
هو انا طبعا مصدقة ان دا ممكن يحصل .. انما يعني خاف يقول دي زيها زي خاف يدافع بالظبط
و بعدين يا عم صلي ع النبي في قلبك كدا ما الناس كانت مالية وسط البلد و لا حد عمل حاجة ،، يعني انت لو كنت قلت كان محدش برده هيعمل حاجة
ما هي أصل السلبية دي زي الامراض المعدية تمام
واضح اننا ينقصنا روح المقاومة الشعبية .. عارفين زي ما الناس كانت بتطلع بايد الهون و المقشات و غطيان الحلل حتي،،، المهم انها مقاومة للنفس الاخير
و بعدين ما الدفاع عن الارض زي الدفاع عن العرض بالظبط
و زمان قالوها .." الارض عرض يا ولدي "
مش عارفة الناس في بلدنا جرالهم ايه ..!! .. خلاص الشهامة و الجدعنة بقت مع الديناصورات المنقرضة
((((((((((((((((((((((((( تنهيــــــــــــــــــــــــــــــــــــــــــــــدة ))))))))))))))))))))
الخلاصة بعد كل هذا الرغي انا قرأت ان فيه حملة حاليا اسمها : " اتكلموا" طبعا انا مش ضدها علي الإطلاق
ولكن انا شايفة اننا المفروض نشتغل علي محورين
و نعمل حملة تانية متوازية مع حملة اتكلموا و نسميها حملة الــ " تورلووب"
اي نعم التوورلوب ...
فاكرين الفيلم بتاع محمود عبد العزيز و نور الشريف لما كان مش بيخلف و حسين فهمي شار عليه انه ياخد حتة من الانترنال لووب من محمود عبد العزيز اللي في نهاية اتهبل و كان ماشي بيقول عاوز تورلوب علي أدي اقطّع فيه ما يخلصشي
آهو احنا هنعمل حملة تورلوب لكل مواطن .. بس تورلوب من نوع تاني
علشان بفرض ان المتحرشين دول فئة ميئوس منها علي حسب ما سمعت و عندهم اسهال مزمن في السلوكيات
فإحنا هنسيبنا منهم خااااالص علي اساس يعني انه طالما ال 48 ساعة اللي جايين عدوا فيبقي مفيش أمل
و بإذن الله كدا هنشتغل ع اللي باقيين اللي هما بيشوفوا هذا المشهد و إتس اوكي معاهم و كدا
طبعا هو فيه اقتراح اننا نمشي نقفّش فيهم .. بس احتمال بتوع حقوق الانسان ميسيبوناش في حالنا
فــ إحنا ممكن نحول هذه الحملة إلي مشروع قومي من ضمن خطة العبوووون إلي المستقبل المبهررررر
و نسميه مشروع التورلوب برده
و نبتدي ناخد الجيل الجديد بأة .. بس بنظام يا حضرات
هنعمل شريحة حلوة كدا تتزرع في المخيخ زي ما بنشوف في الافلام الاجنبي اللي لحست مخنا ( في فيلم لروبن ويليمز ناسية اسمه دلوقتي كان فيه حاجة شبه كدا)
المهم الشريحة دي هتتزرع من ضمن اجراءات استخراج بطاقة الرقم القومي .. يعني اي حد هيروح المصلحة يخلص ورقه لازم يركب الشريحة علشان تستكمل اجراءاته و يبقي عنده بطاقة ..
و الشريحة دي هتقوم بعمل مهم خاااااااااااالص
و هو انه الحلو دا اللي زي الباب لما يكون ماشي في الشارع و يشوف حد بيتعرض لبنت باللفظ او الفعل تقوم الشريحة ترفع مستوى الادرينالين ع الرابع و تشغل المساحات و يلاقي صوت من الداخل بيقوله انت تسبح في بحر الظلماااااا.... آآآآ قصدي هيقوله اتحرك يا لوح مش شايف واحدة زي اختك أو أمك أو مراتك أو خطيبتك واحد بيضايقها .. يقووووم الدم يضرب في النافوخ و يبتدي ياخد رد فعل .. و مش بعيد يحرك أطرافه الاربعة في آن واحد
طبعا الشريحة دي ممكن شحنها يخلص و لذلك هيتصرف معاها شاحن و احتمال هاند فري برده
و هتقولولي طب ما فيه ناس ممكن تركبها و بعد كدا تبطل تشحنها .. هقولكم لااااااااااااااااا ما هو اللي هيفصل شحن هيبقي واضح لكل الناس دا غير انه هيبقي مذبهل كدا و ترتسم علي وجهه تعبيرات هلامية غير محددة التفسير
" Battery low" كمان هيبقي ماشي في الشارع مفضوح بسبب صوت بيب بيب بتاع الــ
و طبعا يجب ان يتم توقيفه بواسطة شرطة المسطحات المائية .. مش بقولكم عبووووون .. مراكب بأة و حركات
طبعا دا اقتراح وجيه جدا لإعادة شحن الرجولة شبه المنقرضة
و احتمال ناخد تصويت ع الموضوع دا
و اللي مش عاجبه برده ممكن يشجب بأقوي العبارات مفيش مشاكل
و اللي عاوز شريحة اتنين تلاتة لحبايبه مفيش مشكلة برده
اول ما نتفق فيهم هنبتدي خدمة الديليفري .. و هنحط نمر تليفونات و اعلانات و كل حاجة
اهم حاجة كله يحضر العوامات علشان العبووووووووووووووون
و دمتم... :D

 
posted by n at 11:02 AM | Permalink |


4 Comments:


  • At December 3, 2006 at 5:03:00 PM PST, Blogger مَلَكة

    أيوووة عليكي نور يا نمنمايتي
    وعلى رأي المثل اللي بقوله دايما
    الرجالة ماتوا في الحرب
    وعشان محدش يطلع يقولي يا آنسة متغلطيش مش كلهم
    ويعملي شويتين عمر الشريف وما إلى ذلك من حوارات حمضانة
    أقول 99.9%من الرجالة في مصر ماتوا في الحرب
    وأهو ملكوش حجة
    نتيجة زي نتيجة الاستفتاءات بالظبط
    احنا شغلنا على مياة بيضا ولامؤاخذة
    المهم بقى
    احنا لو منفعش معانا نظام التووورلوب ده
    نعمل عملية تحضير ارواح(يامامييي)ونحاول
    نحضر أرواح المرحومين الرجالة اللي ماتوا في الحرب دول
    يمكن ربنا يفك عقدة الرجالة ويتعدلوا ويرجعوا رجالة عندهم نخوة وشهامة زي المغفور ليهم زمان
    أما بقى لو المرحومين رجعوا واتعدوا من الصنف اللي موجود دلوقتي
    اللي ملوش تصنيف عند داروين ولا مندل ولا حاجة خالص ده
    يبقى نموتهم كلهم ونستريح منهم
    ماهم كدة كدة زي قلتهم يعني مفيش فرق
    وبكدة هنمنع فعل التحرش من الوجود أساسا
    ده حل جذري تماما
    لو مش عايزين حل جذري
    وعايزين حل برعمي(من على وش القفص مؤقتا يعني)يبقى أقولكم انا بعمل ايه
    أنا بطلع الاتوبيس من هنا بقول يامين يلايمني على قفا الطشله
    آه هو كدة بقى ماهو الذوق مبينفعش
    يعني بقف مستنية على واحد أمه تكون داعية عليه وأجرب فيه قلة الأدب على حق،ومش مشكلة لو دخلت فيه القسم وعملتله محضر
    مهو كل حاجة ليها أول مرة
    المشكلة اللي عايزة حل
    ازاي هخليه ييجي معايا القسم؟
    أثبته بمطواة مثلا؟
    أنا اللي هتثبت في القسم بداله كدة
    عمتا مش مشكلة دي قضية فرعية ابقى افكر فيها بعدين
    المهم...ربنا يقومهم بالسلامة او ياخدهم ويريحنا
    وعلى فكرة انا مش متعصبة ولا حاجة
    بس اهو بقى اقطع عرق وسيح دمه
    ده اذا كان فاضل فيه دم اصلا

     
  • At December 5, 2006 at 6:35:00 AM PST, Blogger admelmasry

    نمانماية

    يا جميل ما انت حلوة اهوه وليكي موضوعات تانية جامده غير الشعر

    امال كان مستخبي فين كل دا ... علي فكرة انا مبسوط جدا .. اني دخلت هنا بالصدفة

    عشان اقرالك .. بجد اسلوبك سلس وبسيط .. ومعبر

    حسيتك زي ماتكوني اختي .. وعمالة بتحكي كلام عادي كده


    تناولك للموضوع جيد جدا .. اوعدك اني احاول اشترك في حملة التوووووووورلووووب

     
  • At December 6, 2006 at 2:48:00 AM PST, Blogger Yasmine Adel Fouad

    انا كتبت رد طويل عريض و مانزلش ايه ابواخه دى

    المهم

    انا عاجبانى فكرة خلاخيلو بتاعة النخوة الصناعية

    و حلو البزنس ده هتحلى و تروق و تزهزه و نبنى عمارات

    قشطة جدا
    هى دى الدماغ الاستثمارية

    ياريت بقى تظبطى مع وزارة الكهرباء و تخلى الشحن يسحب فولت كتير و يبقى لينا نسبة و نخربها و نقعد على تلها

    هنبنى عمارات و نستّر البنات
    ايه الحلاوة دى


    هم يبكى
    و هم يبكى أكتر

    ربنا يحرق كل ظالم


    لفة و غالبا هرجع تانى علشان فى حاجات لسه ماقلتهاش

    بس ايه العنوان الجامد ده بيفكرنى بعنوان المدونة

    :)

     
  • At December 13, 2006 at 3:05:00 AM PST, Blogger doddosh

    بصى يا ستى الجامدة بأفكارك
    انا معاكى ف كل اللى قولتيه
    بس تفتكرى ان الحكومة
    خلتلنا رجالة
    كلهم ف المعتقلات
    منفوخين
    واللى بره هيخاف يقول انا راجل ويعمل حبتين لحسن ياخدوا بالهم منه
    انتى عارفه مين طبعا
    الأمن اللى أكيد كان موجود وكان بيتفرج
    طب مسألتيش ليه على الأمن
    ايه كان دورهم
    بيتفرجوا
    تفتكرى حد هيستجرى انه يشارك
    وهما اصلا مبيشاركوش
    لأ واللى يضحكك بائه انهم كانوا بينفوا اصلا اللى حصل وانها مجرد اشاعات
    وبعد ما الموضوع انتشر بالصور والفيديو
    عاوزين يلبسوها ل دينا الرقاصة
    انا مش فى صفها ولا حاجه
    بس برضه السبب مكنش رقصة دينا يعنى لأننا كلنا عارفين ان مش دينا اللى هتهيج شهوة كل دول
    لامؤاخذة يعنى
    دينا متفرقش كتير عن اى راجل فيهم
    ماعلينا
    نرجع لمربط الفرس وانه ليه الحكومة عاوزة تلبسها ل دينا
    علشان البطالة والفراغ والغلا والكوا
    دى مظاهرة بس من نوع اخر
    من نوع محدش واخد باله انها مش مجرد شهوة
    دى مظاهرة بيقولوا بيها للحكومات هنخربهالكم ونقعد على تلها
    وبرضه انا مش ف صفهم
    ولا ببرر لهم ما فعلوه
    بس ده تحليلى انا الشخصى لما حدث
    وان كان على الرجالة اللى انتى زعلانة عليهم
    هما فين وماتوا ف الحرب ولا لأ
    ما تدوريش علشان متروحيلهمش هكان مهما موجودين
    يا حزنى عليهم