Wednesday, December 6, 2006
انج بسعادتك
عندما تغزو الابتسامة وجهك، تجد علامات الاستفهام قد غزت وجوه الاخرين.
" أنت بتبتسم.. هزلت"
" جاوب على قد السؤال.. فرحان ليه"
كأنهم يستكترونها عليك. فكيف تسول لك نفسك الابتسام بينما هو لا يستطيع دفع الايجار وهي رسبت في الكلية وهم لا يأكلون اللحم..
أعليك الالتفات الى مشاكلهم، أو البكاء لبكائهم أم العناية بفرحك الخاص الذي - حتما- لن يدوم طويلا في بلد كتلك؟
هنا لا نجد الفرح طويلا، لذا علينا استغلال كل لحظة ..
لا يتوجب عليك أن تلوم نفسك لمشاكلهم ، طالما لست سببا فيها. كما أن الحياة أقصر من تحل مشاكل الجميع.
المشكلة الكبرى هي أنك لا تتورع عن أن تلوم نفسك كلما رأيت الحزن في نظراتهم. رغم أن أحدا لم يلم نفسه لأجلك من قبل.
تلوم نفسك ثم تتخذ موقعا دفاعيا تجاه تلك النفس الخبيثة التي تصر على الحزن فتتظاهر بالحزن.تبدأ بالتظاهر أمام الناس حتى تصدق تظاهرك فيصبح حقيقة. أنت فعلا تعيس الان.
والنتيجة؟ لم تصبح حياتهم أفضل، أنت لم تحل مشاكلهم.. فقط أضفت تعيس اخر الى القائمة.وعندما يراك أنسان سعيد فأنه سيكمل الدائرة. لنصبح قوما لا يعرف السعادة.

حافظ على جمال شعورك ، حاول أن تجعلهم يشاركوك.. ولكن ان فشلت لا تشاركهم أنت.
فقط انج بسعادتك.
 
posted by متغيرة شوية at 11:48 AM | Permalink |


12 Comments:


  • At December 7, 2006 at 1:07:00 AM PST, Blogger Yasmine Adel Fouad

    الله عليك يا سلومتى
    فعلا الموضوع ده ملاحظ بطريقة غريبة و مش اللى حواليكى بيبقوا عايزين يحبطوكى لكن هم ما بيصدقوا حد يبقى فرحان فبيبقوا طمعانين ياخدوا شوية من طاقتك الايجابية لكن الكارثة انك انتى اللى بتمتصى طاقتهم السلبية

    مش كل الناس بتحقد على سعادتك و ان كان فيهم بيقول يا بختها بس ربنا يبارك يعنى

    من زمان وصلت لنتيجة ان لحظات الفرح الصافية اللى من غير منغصات مش كتير خالص يعنى كل فين و فين لما تنبسطى و تنسى كل كل همومك او تجيلك حاجة تبسطك تغطى على كل الحاجات الناقصة اللى مش عندك ساعتها قررت استغل سعادتى و طاقتى و اعمل كل اللى كنت مأجلاه و انى منتبهش للناس اللى بتحاول تبوظلى سعادتى و انهم يفكرونى بمشاكل تانيه
    اما الناس اللى بيستغلوكى و يحكولك مشاكلهم بكثافة لما تكونى فرحانة
    فللأمانة على حسب
    يعنى انا بسمع بس لو حاجة قديمة و مشكلة بيتعاد و يتزاد فيها بسمع و اقول رأيى بس مش بعيش المشكلة و اتشحتف مع صاحبها لكن لو حاجة طارئة بغوص فيها بس بحاول اشد اللى حواليا للجانب الاخضر اللى فى الموضوع

    يعنى ساعات الواحد بيكون انانى فى سعادته و عايز يفرح بأقصى طاقته
    لكن برضة للصداقة حقوق وواجبات
    وربنا يسعدنا جميعا

    عارفة انا اكتشفت أخيرا
    ان السعادة دى حاجة داخلية
    يعنى بايدك انتى انك تكونى سعيدة مش كل حاجة حزن و زى ما بيقولوا برة

    there r 2 sides for every story

    بس كده شوفى الحته الخضراء و استغلى وقتك صح و عيشى هتنغمسى فى الحزن عمرك هيقصر مش أكتر


    غالبا هرجع تانى

     
  • At December 8, 2006 at 5:37:00 AM PST, Blogger Known as PHYSCO

    بصى يا سلمى ... مش دايما على فكرة اللى بيقولها بيكون قصده وحش ... يعنى لما بنكون طلعان عينا فى الكلية و مطبقين بقالنا كذا يوم ... لما نلاقى حد بيضحك بنقوم بنسأله فى وشه و بكل بجاحة انت بتضحك ليه ؟ إيه اللى بيضحكك ؟ غالبا بنكون بنقول كده مش علشان نكئبه زينا .. لكنها بتبقى وسيلة مناكشة مننا و بالمرة عايزينه يضحكنا معاه ... انا كده باتكلم على اللى انا باعمله ... لكن لو حد سألنى انتى بتضحكى ليه ... إجابتى واضحة و صريحة ..معلش قلة أدب منى أصل الرباية ما تمرتش فى ... و بافضل أضحك ... أصل مش الجملة دى اللى خلاص هتقلبنى و تخلينى أكشر ... ما انا على طول متضايقة مش هيحصل حاجة لو ضحكت لى شوية ... ده حتى التبسم فى وجه أخيك صدقة ... اضحكى اضحكى و لا يهمك .. حتى لو ضحكتى مش من قلبك ... جاهدى لغاية ما الضحكة تطلع صافية من قلبك .. و مالكيش دعوة بأى حد غيران .. و اللى غيران منا يقلدنا :)

     
  • At December 8, 2006 at 7:55:00 AM PST, Blogger admelmasry

    اوعدك بده حاضر

    بس لما اجي اضحك

     
  • At December 8, 2006 at 9:32:00 AM PST, Blogger انحلت سيور العربه وسقط المهر من الاعياء

    اذا كانت
    الابتسامه اصلا لاتاتى
    بدون ادعا ء
    والملامح حزينه بلا ذنب
    والقلوب مكسوره بلا ادعا ء
    فما العمل؟

     
  • At December 8, 2006 at 6:05:00 PM PST, Blogger مَلَكة

    حلو مصطلح"النجاة بالسعادة"لأن فعلا السعادة شيء نادر الحصول عليه فلازم نبذل جهد إننا نحافظ عليه
    بس انا متفقة مع ايات ان مش شرط يعني تكون"نظرية المؤامرة"على حبة السعادة اللي الواحد بيكون فيها هي تفسير اللي بيحصل
    ثم فعلا الناس همومهم كتير وطبيعي لو حالتك كويسة انك متلاقيش كل اللي حواليك كدة
    والا تبقى يوتوبيا بقى

    موضوعك جميل يا سلومتي

     
  • At December 9, 2006 at 3:22:00 AM PST, Blogger Hamed Ibrahim

    برضه لو الواحد حزين ما حدش بيسيبه في حاله !

     
  • At December 12, 2006 at 1:03:00 PM PST, Blogger متغيرة شوية

    أنا حرة

    أنا معاكي يا ياسمين ان الناس غالبا مبيبقاش قصدها تحبطك لكن هي غالبا حاجة لا شعورية
    جميل قوي انك تقفي جنب صحابك وتشديهم للجانب الأخضر بتاعك.. بس أنا رأيي انك تعيشي المشكلة في وقتها ، لكن بمجرد مترجعي لوحدك ترجعي انت للجانب الأخضر، ومتلقيش نفسك اتشديتي لجانب تاني
    السعادة حاجة داخلية صح ، بس برضه العوامل الخارجية ليها تأثير جامد..لازم يكون في توازن بين الاتنين.



    بيقولوا سايكو

    ايه ده..انت طلعتي منهم بقى ؟ 
    لكن لو حد سألنى انتى بتضحكى ليه ... إجابتى واضحة و صريحة ..معلش قلة أدب منى أصل الرباية ما تمرتش فى.
    يا سلام..الحتة دي بالظبط الللي بعمله.
    هي بس المشكلة مش في جملة ، لكن المشكلة انه بيوردلك احساس بالذنب ، خصوصا لو الشخص ده عزيز عليكي
    عموما أنا ميتخافش عليا...هفضل اضحك

     
  • At December 13, 2006 at 1:34:00 AM PST, Blogger متغيرة شوية

    ادم المصري

    ان شاء الله هتضحك..وكتير كمان
    انت بس انوي


    الجحيم هو الحقيقة

    ليه بس كده..
    عارف ، انت بس حس انك عايز تبقى سعيد، انسى الحاجات الوحشة كلها واعزل نفسك عنها..عيش يومينك يا راجل

     
  • At December 13, 2006 at 2:07:00 AM PST, Blogger متغيرة شوية

    ملكة

    أنا متقة معاكم انها مش لازم كون نظرية المؤامرة..بس ساعات الواحدبيبقى مفروض يمنع نفسه انه يكئب الناس ويسيبهم يفرحوا يومين
    عايزين نشوف موضوعاتك هنا يا هانم


    Hamed Ibrahim
    الناس مبتسيبكش في حالك وانت متضايق علشان تقف جنبك
    ان شاء الله متبقاش حزين أبدا..
    على كرة مفاجأة حلوة اني الاقي رد منك على الموضوع يا حامد

     
  • At December 13, 2006 at 2:18:00 AM PST, Blogger متغيرة شوية

    مهاب

    نظرية جامدة جدا..وهي فعلا اقرب حاجة لوجهة نظري
    يمكن الموضوع محتاج تفهم لموق الانسان اللي قدامك في كل حاجة

     
  • At December 13, 2006 at 6:45:00 AM PST, Blogger عادل سلامة

    بعيدا عن الموضوع نفسه .. عجبنى جدا اسلوبك فى الكتابة .. فعلا تسلم ايدك
    .. هى دى الناس اللى بتعرف تقول
    احسنتى

     
  • At December 14, 2006 at 1:29:00 AM PST, Blogger وجع دماغ

    والله موضوع جميل
    بس يا ترى أحنا شعب فرفوش كدة ويحب الضحك زلا شعب نكدى
    الحقيقة تقول أن قدماء المصريين أهتموا ببناء المقابر والمعابد الجنائزية على حساب المنازل والقصور
    وأننا شعب يخاف...موت
    ونكره....عمى
    ولو ضحكنا ...نقول خير اللهمك أجعلوا خير
    بس كمان أحنا شعب أبن نكته بنضحك على كل حاجة حتى لو على نفسنا
    دى يمكن ميزة الشعوب اللى عمرها طويل شوية كام ألف سنة
    الناس كل حياتها بقت تسد النفس
    عشان كده بيتعجيوا لما يلاقوا حد بيبتسم
    بس الأبتسامة والضحك ممكن تكون عدوى ذى الحزن بالظبط
    ما تيجوا نعدى اللى حوالينا