This comment has been removed by the author.

برغم إنه سؤال مستهلك .. بس لما باجي اسأله لنفسي ببلم
حقيقي مش عارف
الواحد كتير بيقعد يتخيل حياته مع أي شخص تاني .. ما بيتقبلهاش .. برغم إن يمكن تكون فيه كل الصفات اللي يتمناها أي شخص وفقا للمعاير الممتازة
بس فيه حاجات طبعا ما ينفعش الواحد يشرحها لأن مش هايعرف يعبر عن الاختلاف بيبقى فين وفي ايه

وهو يعني الواحد مش هايعرف يتجوز حد تاني؟ المأذون يعني هايقول لأ؟
هل مش هايعرف يخلف منها .. دي سيان مع أي حد
هل مش هايعرف ياكل ويعيش ويشتغل ويربي ولاده ويعلمهم أحسن/أسوأ علام
كل ده هايقدر عليه .. بس المشكلة مش في ده كله .. المشكلة في حالة صعب تتوصف
حالة ما قالهاش صُنع الله إبراهيم في روايته (ذات) بس حسيناها من خلال الرواية لدرجة إن بيبقى صعبان عليك تخلص الرواية

حاجة قال ملخصها أمل دنقل وكانت ملخص لحاجات كتير قال بعض منها
قال:
"هي أشياء لا تشترى !!"



ما علينا !

موافقة جداً على رأي حامد
عارفة يا ياسمين أول ما قريت السؤال
قلت"لأ طبعا"وبعدها فكرت
كام مرة في حياتي كنت رافضة وضع ما رفض مطلق وبحس إني عمري ما هتراجع في قراري ثم ألاقيني لما اتحطيت في ظروف معينة اضطريت أقبل
وبعدها الأمور تبقى عادية مش بالاستحالة اللي كنت متصوراها بيها قبل كدة

دلوقتي أنا رافضة حكاية إني أتجوز جواز صالونات،لو عشرة برضو سألوني هرد نفس الرد وهرفض
ومعنديش استعداد اتجوز بالطريقة دي لاني مش هتجوز جوازة والسلام
مش مقتنعة بفكرة إن الواحد يعمل كل حاجة حتى لو بدت للحظة غريبة لمجرد إنه يتجوز وخلاص
ويمكن علشان أنا لسة صغيرة فمتمسكة برأيي دلوقتي
إنما بشوف ناس بتكون أرائها كدة لغاية فترة معينة
وبعدين00
يوافقوا على اللي مكانوش راضيين بيه
مش عارفة هل ده خاضع لحكم السن أو حكم إيه بالظبط

لكن أعتقد إجابتي في الوقت الحاضر هتكون الرفض القاطع للنوع ده من الجواز

لا طبعا

بصي يا ياسمين،موضوع الجواز عندي مرتبط بأن يكون في حد عايزة اتجوزه..لو ميش يبقى الموضوع مش اولاوياتي دلوقتي لأني لسا صغيرة
بعدين بقى أكيد عايزة اتجوز لأني مش عايزة أكبر والاقي نفسي وحيدة
لكن أكين مش علشان الجواز هخلي نفسي اتهان بالشكل ده.. أتعرض على واحد وهو يقول رأيه اذا كنت أعجبه ولا لأ.. الموضوع شبه العرض في سوق الجواري كده
أنا موافقة على الجواز من غير حب لكن مش صالونات..يعني زي جواز بابا وماما كده..مش معقول أهلي ميتجوزوش صالوانات وانا اللي اتجوز كده

بعدين في نقطة تانية ، أعتقد بقى ان الراجل اللي عايز يتجوز صالونات لاهيعجبني ولا أنا هعجبه.. لأنه بيبقى عايز من البنت مواصات محددة:

متدينة: ودي بتعتمد على المظهر.. يعني كل ما كانت مغطية أكتر كانت أفضل..مش مهم بقى بتتعامل مع الناس ازاي ولا بتعمل بالقران في حياتها ولا لأ
وطبعا مبتكلمش ولاد وعينيها تكون في الأرض

حلوة : مواصفات شكلية بحتة
مثقفة : ودي معاناها انها تكون جامعة لو الراجل جامعي.. مش معاناها خالص انها تكون بتناقشه ولا ليهارأي ي أي حاجة سياسية مثلا..لأن الراجل بيحب يبهرها بأنه هو فقط عنده الاراء التي لا تدحض

علشان كده الموضوع ده ميناسبنيش بالمرة

انا رأيي تماما من رأي "متغيرة شوية" يعني

ان قعدة الصالونات دي بتبقى تمثيل في تمثيل وكل بنت بتمثل فيها و بأداء محترف

1- الرقة
2- الأدب
3- التدين
4- الهدوء
5- الطاعه وعدم الاعتراض

دة طبعا غير الاستعدادات قبلها باسبوع للزيارة الميمونة وزي مابنسمع من دهان الشقة والصالون اللي بيستلفوة من الجيران والاقتعه اللي البنت بتتنقع فيها اسبوعين قبل الزيارة الميمونة علشان تبان بيضاء وحلوة
و توضيبات مختلفة لعينيها وشعرها و خلافة

المهم بعد الجواز ومن ليلة الدخلة تبان الحقيقة المرة وتلاقيها
عصبية
قليلة الادب والحياء
الدين عندها مظهر, ولا تعمل بة في حديثها ولا تصرفاتها ولا لبسها ولا اخلاقياتها
عصبية وزرزورة و أمارة ونكدية وبتخانق دبان وشها عمال على بطال
ومش بيعجبها حاجة وطلباتها وزنها طول الوقت

دة طبعا غير الخضة اللي العريس المأسوف على شبابة حايتخضها يوم صباحيتة لما ينور النور ويشوف وشها الحقيقي بدون مساحيق ولا اصباغ
حايشوف امنا الغولة بشعرها المنكوش وريحتها المنتنة ووشها المكرمش وعنيها المعمصة ووارمة عالصبح

بالنسبة لى شايفه ان الحل فى السؤال
هتتجوز ليه
على اساس اجابتك تعرف هتتجوز ازاى
انا مؤمنة ان الواحد بيقابل حد عايز يكمل معاه حياته كلها
و يلاقى كيمياء بينهم و يحبوا بعض
مش شرط حب بتاع سهر الليل و العياط ع المخدة و الشحتفة
لكن حب بعمق اللى هو هتشارك مع ده حياتك
و انك تقول هو ده اللى عايزة
ساعتها علشان تشرع الارتباط ده هتتجوز
لكن مش هتتجوز علشان كلنا هنتجوز
هيييييييييييييييه
و ان ده علينا حق و بعدين الحب او الارتياح جه جه
ما جاش ادينا عايشين

علشان كده اجابتى لا طبعا

_______________

اه يا خفى لو الطقم ده كله اتجوز صالونات يبقى مسخرة

:)

الحصان الاسود
مش كل البنات بتمثل على فكرة
يعنى انا اول عريس صالونات جالى من سنة تقريبا و كان حد يعرف ماما و بابا و عارفين اخلاقه و كده و قعدوا يقولولى انه شاب كويس جدا و عارفهم طب صلى استخارة و قررت اصلى استخارة ساعتها و حلمت حلم معناه ان الانسان ده كويس جدا و كان احساسى انى مرتاحة و قررت اقابله عايزة اقولك ان يوميها اتخانقت مع ماما علشان محطيتش مكياج خالص و هى قالتلى طيب حطى ال gloss
او الروجاجو اللى بتحطيهم فى خروجاتك اصلا قلتلها لا

عايزة اقولك بقى انى اول ما دخل البيت و انا فى اوضتى حسيت بكم مهانه و انى حطيت نفسى فى موقف مقرف و قلت لولا انه فى البيت مكنتش خرجب
بس لما خرجت بعد معاناة كانى داخلة امتحان شفوى
عايزة اقولك ان مامتى كنت بتشدنى
ولما طلعت انا شخصية جريئة اصلا و باخد ع الناس بسرعة
تخيل قعدت بقى مش بنطقمش مكسوفة بس علشان عماله اقول ايه اللى بعمله ده
و ماما و بابا اللى بيتخانقوا معايا و حاسين انهم فشلوا فى تربيتى كانوا بيقولوا فيا شعر لدرجة انى كنت عايزة الزمن يقف و حد يسجل الكلام ده
:)

بس اول ما العريس مشى بقى هو مفيهوش عيب اقوله اصلا بس انا كنت ازددت تأكيدا انى مش هتجوز بالطريقة دى
و انى وافقت كده غلطة
دلوقتى لما بييجى عرسان صالونات مش بقابلهم من الاصل و بقول يتقالهم لا
اهو مش كل البنات بتمثل علشان مش هندخل شركة و مستقبل بغش

بس يمكن اللى يمثل لو واحدة املها انها تتجوز صالونات و مش بتغش بمعنى غش لكن مش بتظهر عيوبها من غير سبب يعنى


عموما كل واحد يتجوز بالطريقة اللى تريحه علشان اللى بيشيل اربة مخرومة بتشر عليه لوحده غير ان محدش يعرف الخير فين

بس كده كلنا صالونات لا
فى حد عنده رأى تانى

مهاب انا متفقه معاك فى نص كلامك التانى
بس بخصوص النص الاولانى هل مقابله واحده مع حد تكفى انك تختاره شريك حياتك ؟
اه فى ارتياح بس مش توصل لشركة عمر

بس السؤال اللى قلته هتتجوز ليه
لو هتتجوز علشان الجواز يبقى ممكن الطريقة دى تنفع

وانت ماطولتش و لا حاجة

انا حرة
:

(((مقابلة واحدة لا تكفي )))




ودة غير الفيلم الشهير إمرأة واحدة لا تكفي

ههههههههههههههههه

مهاب

انا على فكرة قلت رأيى يعنى لو واحد عايز يتجوز و خلاص علشان يستقر و يجيب عيال فده ينفع معاه جواز الصالونات
و انا كمان مش بعمم
يعنى اعرف 2 اخوات واحد اتجوز جواز صالونات و مستقر جدا مع مراته و اخوه اتجوز واحده عن حب و محاربة مع اهله و بعد كام شهر اتطلقوا
صحيح رجعوا لبعض تانى بعد فتره بس السعادة هنا مش زى هنا
يعنى مفيش مقياس

انا مش اعتراضى الحد هيقابل العروسة او يعاينها لو هو نيته يتفرج فين
لكن كان كل قصدى انى بستغرب ان الواحد ممكن يربط مصيره بمصير حد ميعرفهوش

بخصوص بقى موضوع الخطوبة
فالخطوبة دلوقتى يعنى هنبدا نجهز بقى اكتر منها تعارف


و لو على رأيى الشخصى
فانا مقدرش اقول رأيى كحم مرجعى هنا لانه يعبر عنى لوحدى
و عموما انا قلت بالنسبة لى مش هرتبط غير لما احس انى قابلت الانسان اللى عايزة اتشارك معاه كل تفاصيل حياتى و اكمل معاه عمرى كله
مش حب و قصة و كده اكتر منه ارتياح و دماغ بتتقابل فى نقطة
و معتقدش ده يتحقق بجواز صالونات
يعنى انا لو ما قابلتش شخص عايزة اكمل معاه مش هتجوز
لكن مش هتجوز لفكرة الجواز نفسه
انا هتجوز علشان اشرع علاقة بينى و بين انسان عايزاه معايا مش اكتر


طبعا زى ما قلت ده ع المستوى الشخصى
لكن ده لا ينقص من قدر جواز الصالونات و لا يزيد من قدره
هى حرية شخصية مش اكتر


سعيدة لمرورك تانى
و سورى ع الصداع
حساب الاسبرين عندى

وأتجوز ليه ؟

عشان أقرف نفسى !؟ :D

وناس تتطلب مهر وقايمه وشبكه وجهاز وأفلام :D

وبعد الجواز أتمتع يادوب تلت أيام :D

وبعد كدا أعيش فـ جحيم..

أولاد

مدارس

مصروف البيت

ياستى إرحميناا

جواز إيه بس :D

اللهم ديم نعمة العزوبيه وإحفظها م الزوال

تحياتى...

(f)

امير الظلام

والله الجواز استقرار احيانا لكن الواحد بيتخلى عن حرية مش قليله علشان كده ازم تكون نابعه عن اقتناع تام علشان الواحد ما يتخنقش بسرعة بعد الجواز
اما بخصوص طلبات الجواز فده موال تانى

جواز صالونات ؟؟... وليه لأ
هو آه أجمل حاجة عند البنت إن عريسها يعجب بيها و يحركه ليها قراره هو لوحده و إعجابة و مش أي حاجة تانية
وآه جواز الصالونات بيسرق من البنوته احساسها بإنها ملكة
********
بس ليه لأ
ماحناش في زمن القولب فيه بيضا.. ولا الحب فيه دليل على السعاده
بالعكس .. الحب بقى سبب للتنازل و الضعف
و الجواز مش بس اتنين عاوزين يريحوا بعض
ده حياه مليانة بحقوق وواجبات و أطفال و مسئولية
يعني لو حسابات الصالونات هاتكون أعقل
يبقى ليه لأ