Wednesday, January 3, 2007
بيعطيك جوانيح
البوست دا عن امنيتي في عام2007 و ربنا يسهل و تتحقق
طبعا هو البوست اتأخر كام يوم بس دا نظرا لاني عيانة اوي دا اولا
و ثانيا علي بال ما خلصت شغل في البنوتة اللي فوق دي
....المهم
بتمنى بتمنى ,, ان السنة دي يطلع لي جناحين
مش كتير على ربنا
ثم انا نفسي اوي يطلع لي جناحين
و اطير و ارفرف في الفضا علي رأي وردة
.
.
كنت زمان دايما اقول لنفسي جملة
only love can set you free
بس دلوقتي حاسة ان الحب مدانيش الجناحين اللي نفسي فيهم
طبعا دا مش بطر علي النعمة
يعني الحب دا نعمة كبيرة اوي ربنا بينعم بيها على قلوبنا
اننا نعيش علي الارض بالمحبة ،، بالود و التراحم ،، بالعطف بالإيثار، بالشفقة و الرحمة
و كل المعاني الجميلة اللي تحت قيمة الحب
....لكن برده
يمكن التجرد بأة هو اللي ممكن يوصلني للجناحين
يعني ان يبقي الواحد متعلق بربنا اوي اكتر من اي شيء تاني
و انا للأسف لسة بعيدة عن المرحلة دي
و إن كنت بتمنى مكونش بعيدة أوي
.
.
المشكلة الحقيقية هي اني متأكدة انه كان عندي جناحين
يقين غريب جوايا ،، او زي ما يكون ذكريات مدفونة
يمكن كنت في حياة اخرى فراشة؟
أو جايز كان عندي جناحات و لما اتكسرت حصلت لي صدمة افقدتني الذاكرة
المهم اني متأكدة انه كان عندي جناحين
بس راحوا فين؟
حسب نظرية من نظريات التطور ان العضو الذي لا يستخدم يضمر
يكونوش حصلهم كدا ؟
احيانا بفكر اني يمكن كنت فعلا فراشة
و بعدين حد شرير ألقى عليا سحر و خلاني بني آدماية
ازاي بقى نفك السحر دا .. هو دا السؤال
.
.
المهم انا مليش دعوة انا عاوزة جناحين
عاوزة اطير
المس النسمة الباردة اللي فوق
العب بالسحاب اللي عامل زي غزل البنات
اطير فوق الغيطان الخضرا
فوق البحر
فوق الصحرا
انا عاوزة اطير بعيد
.
.

زيي زي أي فراشة
يا رب
 
posted by n at 3:26 AM | Permalink |


22 Comments:


  • At January 3, 2007 at 5:11:00 AM PST, Blogger Yasmine Adel Fouad

    نغمو

    أول ما قريت العنوان قلت
    redball
    بس الموضوع طلع جد بقى
    ربنا ينولك اللى فى بالك و يحققلك أمنياتك علشان انتى بنت حلال و انسانه تستاهل الصراحة
    أنا طول عمرى عايزة جناحين برضه
    بس مش فارق معايا يكونوا جناحيين يخلونى أطير لفوق ممكن جناحيين معنويين
    يخلونى أحس انى قادرة أطير و خلاص
    حكايه ان كان أصلك فراشة و الله كل شئ جايز يا بنتى بس كده يبقى انتى لازم الأمير يبوسك فالنحس يتفك
    :)
    عارفة يا رولا
    ماما كانت بتقولى لما أقولها ان نفسى يبقى ليا جناحات و أطير كانت تقولى ان ده وسيلة من وسائل الهروب
    تفتكرى ؟
    عموما ربنا يديكى جناحات
    بس خدى بالك من نفسك علشان فى صيادين أشرار يا اوختشى
    ولو عرفتى السر ماتنسيش تقوليلنا عليه

    و ربنا قادر على كل شئ
    الف سلامة عليكى بقى
    و خدى بالك من نفسويتك

    على فكرة الصورة وهمية
    موووووووووووووووووا
    بفكر ارجع تانى علشان واحشانى

     

  • At January 3, 2007 at 11:55:00 AM PST, Blogger الأميره أوسه

    أيه ده أنت مش عندك جوانح
    طيب أزاى بطيرى
    أنا ممكن أطير فى أى وقت
    أغمض عنيه وأطير
    وأحلق فى السما
    و أتصاحب ويا السحاب
    وأتعرف على النجوم
    وأعرف سر القمر
    و لــما الشمس تحــما
    أرجــع تانى بشر


    ربنا يديكى جناحات

     

  • At January 3, 2007 at 1:50:00 PM PST, Blogger n

    انا حرة
    يا بنتي معنويين ماديين المهم انهم جناحين و خلاص ..هو انا يعني هنقي كله كويس
    المهم يطلعوا
    بعدين كلام مامتك فعلا اظنه صحيح
    يمكن الواحد مل من الهروب لجوا فنهرب لبرة شوية بأة

     

  • At January 3, 2007 at 1:51:00 PM PST, Blogger n

    أوسا
    احتمال كبير ابتدي احقد عليكي علشان عندك جناحين
    و ميرسي ع الدعوة يا جميلة

     

  • At January 3, 2007 at 11:37:00 PM PST, Blogger مـحـمـد مـفـيـد

    كلامك جميل وفكره رائعه كي نطير نهرب من واقعنا
    والصوره وهم

     

  • At January 4, 2007 at 6:21:00 PM PST, Blogger IBN BAHYA - إبــن بهيـــــــــــــة

    جناحين مره واحده؟ ربنا يعطيكي ويعطينا يا رب .. بس ما تسيبيناش وترفرفي بعيد .. حطي عندنا هنا كل شويه

    أرق تحياتي

     

  • At January 4, 2007 at 9:15:00 PM PST, Blogger .:.-=- ELGaZaLy-=-.:.

    دايما كنت كل ما اتخنق من قرف الحياة والمشاكل...اقول انا عايز اطير

    يا سلام لو الواحد يعرف يطير ..


    لحد ما حققت امنيتى وطرت

    حقيقى مش مجاز اشتركت فى فريق المظلات ..فى نادى الجلاء وكدة كلا ما اتخنق...

    50 ج سعر القفزة وطير يا معلم.....


    سيدتى الا معقولة دائما ... دام قلمك واحلامك...

    وكتابتك

    كل سنة وانتى طيبة

     

  • At January 6, 2007 at 2:26:00 PM PST, Blogger أميرة

    الحرية موجودة وتقدرى تطيرى فى السما وتحلقى كمان

    مش بهزر طبعا بتكلم جد اكيد فى حاجة فى حياتك بتعمليها

    تقدر تخليكى تحسى انك طايرة وحرة بعيد عن قوانين الجاذبية الارضية الهوا له احساس مختلف والارض والسما والحياة كلها انا عن نفسى بطير من غير جناحات بطير بروحى

    اتمنى امنيتك الامعقولة تتحقق

    تحياتى

     

  • At January 6, 2007 at 5:08:00 PM PST, Blogger أسوور

    تعرفى انا فى يوم تمنيت ان اصبح عصفورا يحلق فى السماء ولما فشلت تمنيت أن أصبح غزالا شاردا فى الجبال .. ولما فشلت تمنيت أن أصبح وحشا كاسرا فى الأدغال .. ولما فشلت تمنيت أن أصبح امرأة ذكية .. فتحققت الأمنية .. ويا ليتها ما تحققت

     

  • At January 7, 2007 at 12:51:00 AM PST, Blogger --

    نغمووو..

    نتى مش شايفه ان الجوانح الحقيقية دى ممكن تخلييكى فى مأزق

    قوليلى ليه..

    كل اللى عايز يروح مشوار بقى يقولك اعدى عليها توصلنى فى السريييع
    هههههههههههههههههههه

    بضّحك معاكى خخخخخخخ

    ولو فراشة بجوانح فوشيا ..دانتى تبقى عسولة قوى

    حتى فرصه تبقى تعدى تقعدى معايا فى الشغل شوية وتهونى عليا العذاب اليومى


    قادر على كل شىء .

    ديرى بالك على جوانحك يا اخيتى

     

  • At January 7, 2007 at 9:19:00 AM PST, Blogger n

    محمد مفيد
    ميرسي يا محمد علي تعليقك
    ربنا يكرمك

     

  • At January 7, 2007 at 9:21:00 AM PST, Blogger n

    ابن بهية
    ربنا يكرمك علي الدعوة
    و متقلقش انا اكيد لو طرت هرجع
    يعني الواحد برده عنده مسئوليات :D
    المهم اني احس اني قادرة اطير و ارجع بحرية

     

  • At January 7, 2007 at 9:24:00 AM PST, Blogger n

    الغزالي
    ماشي يا معلم هي فكرة المظلات لا بأس بها
    بس هي محسساني اني هقع من فوق لتحت مش هطير لفوق
    لكن عموما هي اكيد بتحسس انك فرى و كدا
    عموما انت خلي بالك من نفسك في القفزة برده علشان بسمع ان الهبوط لو مش صح ممكن يحصل تمزق في كعب الرجل التواء في الكاحل حاجات من دي يعني
    و اتمني لك تحليق ممتع و هبوط آمن :)

     

  • At January 7, 2007 at 9:30:00 AM PST, Blogger n

    أميرة ويلز
    اهلا بيكي يا ستي و ربنا يديم عليكي جناحاتك
    انا ملاحظة ان ناس طتير بتطير و انا كدا هبتدي اتغاظ :)
    و طبعا انا بعمل حاجات كتير في حياتي بتسعدني جدا
    لكن المشكلة في احساسي زي ما قلت انه كأن كان فيه جناحين و فقدتهم
    يعني الاحساس بأني معدتش خفيفة
    عموما ربنا يسهل يمكن يطلعوا تاني لو ركزت شوية :D

     

  • At January 7, 2007 at 9:33:00 AM PST, Blogger n

    ياسمين
    طب يا بنتي طالما كل امنياتك بتحقق كدا ما تاخدي بالك انتي بتتمني ايه بدل الندم
    و بعدين ما تتمني لي طالما العملية ماشية كويس معاكي :D
    و ميرسي علي تعليقك
    نورتينا

     

  • At January 7, 2007 at 9:37:00 AM PST, Blogger n

    غااادو
    انتي جاية تشتغليني و لا ايه يا زعروووبة؟
    و بعدين قري لي بأة في الامنية
    كل دا علشان اوصلك و ارحمك من الحوادث اللي بتعمليها 7 ايام في الاسبوع
    متخلينيش اسيح لك و اجيب سيرة الحمار :P

     

  • At January 13, 2007 at 12:33:00 AM PST, Blogger Memo

    كل الناس عايزه تهرب عايزه تطير
    واهديكي الكلمتين دول
    من بكره هعدي هخطي الباب
    هكسر قيدي واطير لسحاب
    ههرب هطلع مالسرداب
    حريتي ملهاش اسباب
    ايوه املي عمره ما غاب
    ايام سجني هتبقا سراب
    هزرع بين وبينها حجاب
    واحصد عمري بعد ما طاب
    صبري لا ودا ولا جاب
    جرحي لا اتداوا ولا طاب
    من بكره هعدي هخطي الباب

     

  • At January 19, 2007 at 8:19:00 AM PST, Blogger n

    كلامك جميل يا ميمو
    تسلمي علي اضافتك
    و ربنا يحقق احلامنا كلنا

     

  • At January 28, 2007 at 7:40:00 AM PST, Blogger emz

    يا رب
    يا رب

    تطلعلك جناحات يا نمنماية و تطيرى براحتك
    و عقبالنا احنا كمان

     

  • At February 13, 2007 at 10:47:00 AM PST, Anonymous Anonymous

    يارب إن شاء الله توصلي للي انتى عاوزاة

    وتحلقي في الفضاء كمان

    واللى عاوز حاجة بيوصلها إن شاء الله

     

  • At May 16, 2007 at 1:57:00 PM PDT, Blogger yasoooor

    انا عاوزه اجىىىىىىىى معاكمممممممم

     

  • At May 16, 2007 at 2:01:00 PM PDT, Blogger yasoooor

    يا بنات قمرات زى الشربات اعرفكم بنفسى انا يسرا ممكن ادفس بينكم اصلكم عجبتونى اوى وعمرتوا الطاسة وانا دلوقتى فى حاله كبت وتطرف وبالتالى عاوزه افضفض اجى معاكم اممممم وممكن يا حلوين عربون المحبه هاجبلكم الجوانح بس تحبوا جوانح رومى ولا بلدى ولا انا مش فاضيه هاجيب جوانح كوكى نص سوا وكل سنه وانت حلوين

     
Post a Comment ~ back home