Sunday, February 11, 2007
من بعد سوبرمان
في رواية "من بعد سوبرمان" من سلسة فانتازيا لأحمد خالد توفيق ، بيتخيل الكاتب الحياة في أمريكا بعد مقتل سوبرمان على يد مجرد مجنون هو لوثر.استولى لوثر على الحكم في أمريكا ، وخلى الجريمة هي القانون .

"الغريب انه بعد ما مات سوبرمان – لم يعد لسنترال بارك ذات البريق القديم المثير .. فتحت حكم لوثر وعصابة المجرمين والقتلة التي تمثل سلطته التشريعية؛ صارت الجريمة هي القانون والقتل هو القاعدة .. وبالتالي غدا على من يحب أن مخالفة القانون أن يصير شريفا.

الجزء ده بيتطابق تماما مع مصر دلوقتي .. بقت الجريمة هي القانون ، لأن بتحكمها عصابة زي عصابة لوثر بالظبط. شايفة بقى واحد عبقري بيبص يقول" اوبااااااا قصدها ايه بسوبرمان ..أكيد قصدها عبدالناصر"، ومن موقعي هنا أحب أقوله لأ يا فقيق ، أنا لا قصدي عبدالناصر ولا بتاع، لأن الراجل رغم انه فيه حاجات كويسة ، هو اللي خلا البلد بلد عسكر. يعني لما تسمعهم بيغنوا في الفيلم الراقي جدا عسكر في المعسر" عظيمة يا مصر ، يا أرض اللوا " متفتكرش انهم قصدهم على ارض اللوا بتاعة بولاق ، لأ الأغنية أعمق من كده بكتير .. المقصود إن مصر بقت فعلا أرض اللوا ، أو الشرطة عموما ، غير كده يبقى أنت ابن ستين في سبعين وملكش أي حق في حياة كريمة.
زي ما الجزيرة كده بتساهم في صنع الأحداث ، الشرطة المصرية كمان بتساهم في صنع الحدث .. بقت هي اللي بتخالف كل القوانين ، وبقى الدور الوحيد للشرطة إنها تكون حرس خاص للناس الكبار ، لكن السبعين مليون مواطن ملهمش حتى حق إنها تحمي أرواحهم وممتلكاتهم ، مش بتكلم على حرية وديموقراطية هنا ..أنا بس بتكلم على حماية الروح والممتلكات يعني أضعف الإيمان . زي مثلا موضوع سفاح المعادي اللي مش عارفين يمسكوه لغاية دلوقتي ( طبعا بفرض ان الأقوال اللي بتقول انهم عارفينه بس سايبينه يعمل جو وزيطة مش صحيحة).
الناس اللي بيطلع عين أبوها في المواصلات علشان تروح جامعتها وأشغالها ، تفضل واقفة على الموقف بالساعات على ما ترضى مواصلة تقفلها، لكن العادي جدا برضه انهم ميلاقوش ولا مكروباص يركبوه علشان في لجنة مرورية . يعني ايه دور اللجنة هنا؟ انها تقطع عيش السواقين في اليوم ده ، وتخلي الموظفين والطلبة ميوصلوش مصالحهم ..وطبعا مش بعيد لو واحد موظف ياخد خصم كام يوم معتبرين. وطبعا الغرض الأساسي من اللجنة هو فرض الإتاوة على السواقين. يعني حتى شرطة المرور شبه اخواتها .. نفس الانحطاط.
كل مهنة فيها الصالح والطالح، لكن الشرطة فيها الطالح بس ، الشاب بيبقى من عيلة محترمة وعندها أخلاق لغاية ما يخلص الثانوية ويقرروا يدخلوه الشرطة علشان يبقى ليهم ضهر ، ياخدوه في كلية الشرطة يضربوه علشان يعلمو انه يضرب ويشتموه علشا يعلموه انه يشتم ، لغاية ما يوصلوه لأكتر درجات الانحطاط الأخلاقي ساعتها يبقى اتخرج بامتياز.
رغم كده بقى وجود شرطي ضروري في كل عيلة علشان يعرفوا ياخدوا حقهم ، وهو برضه مش بيعمل الخدمات دي ببلاش..كله بحسابه.
 
posted by متغيرة شوية at 2:07 PM | Permalink |


10 Comments:


  • At February 11, 2007 at 4:42:00 PM PST, Blogger sharkawoo

    الا معقول في الموضوع إن محدش بيقول لا :(

    يعني عارف إنه بتهان وبيقبل....

    لا تعليق علي حالنا....

     
  • At February 14, 2007 at 10:27:00 PM PST, Blogger Sharm

    عن نفسي اعرف ظابط مرور عربيته كلها مخالفة و عمره ما وقف في اشاره و اللى يقدر يعمل فيكم حاجة يعملها .. و طبعا بيحل ده لنفسه و يحرمه على غيره فلو واحد مركب فانوس زينون بسحب رخصته لانه مخالف

     
  • At February 15, 2007 at 1:25:00 AM PST, Blogger .:.-=- ELGaZaLy-=-.:.

    زي ما الجزيرة كده بتساهم في صنع الأحداث ، الشرطة المصرية كمان بتساهم في صنع الحدث .. بقت هي اللي بتخالف كل القوانين ، وبقى الدور الوحيد للشرطة إنها تكون حرس خاص للناس الكبار ، لكن السبعين مليون مواطن ملهمش حتى حق إنها تحمي أرواحهم وممتلكاتهم ، مش بتكلم على حرية وديموقراطية هنا ..أنا بس بتكلم على حماية الروح والممتلكات يعني أضعف الإيمان . زي مثلا موضوع سفاح المعادي اللي مش عارفين يمسكوه لغاية دلوقتي ( طبعا بفرض ان الأقوال اللي بتقول انهم عارفينه بس سايبينه يعمل جو وزيطة مش صحيحة
    ___________________________

    لا الى ساهم فى دة الخوف الى اترسم فينا من جنس العسكر...ويمكن احنا وجدود جدودنا ...ساهمنا...يا فرعون مين فرعنك..

    ملقتش حد يلمنى لو كنا اتكلمنا,,,مكانش دة بقى حالنا...اتكلمو اتكلو ما احلى الكلام وما اعظمة وما الزمة اتعلمو تتكلمو

     
  • At February 15, 2007 at 10:41:00 PM PST, Anonymous Anonymous

    السلام عليكم

    احنا حنفضل طول عمرنا كده في تخلف مستمر
    مادام محدش بيقول "لأ"
    وكله متكل على التانى إنه يجيبله حقه

    واللى بيتعمل فينا ده بقي خلاص العادى
    حيقولوا اشمعنى جايين تتكلموا دلوقتى

    ومن آمن العقوبة اساء الادب

     
  • At February 17, 2007 at 1:43:00 PM PST, Blogger ملَكة

    عااادي
    المفروض علينا نستحمل ونحطها في بوقنا ونسكت ونسيبهم يعملوا اللي هما نفسهم فيه طالما معندناش حتى الجرأة نعترض
    والدليل على كدة الموقف اللي مش قادرة لا انساه ولا ابطل كلام فيه
    مشهد الظابط اللي واقف أمن للجامعة الأمريكية وكان بيصور بنت أدامه بالموبايل اللي معاه وهي مش واخدة بالها،كان بيصورها لمجرد انها لابسة بنطلون وبلوزة،أو ربما بيصورها لأنها بنت أصلا طالما مش فارق معاه لبس ولا حاجة،ربما بيصورها لأنه فاضي،أو ربما لانه متأكد إن محدش هيتكلم لما يشوفه بيصورها،زي بالظبط ما انا شفت الموقف وحطيتها ف بقي ومقدرتش أتكلم ولا انطق بحرف واحد
    زي بالظبط ما لما حكيت لأبويا وأمي قالولي الحمد لله انك متهورتيش واتكلمتي
    زي بالظبط لما بحكي لحد ويقولي في الآخر
    عاادي ماحنا عارفين!!!
    ربنا على الظالم،ولا أقولك
    مش هدعي عليهم تاني
    أصل ربنا بيقول"لا يغير الله ما بقوم حتى يغيروا ما بأنفسهم"صدق الله العظيم

     
  • At February 18, 2007 at 6:44:00 AM PST, Blogger Supernova

    بوست جامد وده اولا

    ثانياً بقا لو اتكلمنا في الموضوع ده حناخد كتير

    مشكلتنا اننا معدناش بنتكلم بالدين
    وبقينا شغالين بالمصلحة

    وبنبعد اي حاجه عن اوامر ربنا

    بنشتغل بدماغنا يعني

    مثلا موضوع الرشوة العلني اللي في ميدان رمسيس دي

    العساكر بيقبضوا من سواقين الميكروباص علشان يدخلوا الميدان

    وتيجي تسألي العسكري يقولك انا عبد المأمور

    طب لما ربنا يسأله حيقول ايه ؟

    يضيع نفسه علشان جنية
    ولعن الله الراشي والمرتشي والرائش

    يعني يعرض نفسه للعن والطرد من رحمة ربنا علشان خاطر انسان
    حيكون زيه برضه

    وكمان بتاع الميكروباص يقولك مشي حالك خلينا ناكل عيش
    عيش ايه ده

    يعني تدفع رشوة علشان تاكل عيش
    وفكرك ربنا حيباركلك في العيش ده ؟؟

    والله موضوع يوجع القلب

    وكمان مشكلتنا وخيبيتنا القوية اننا منعرفش اللي لينا

    لكن نعرف اللي علينا

    مثلا ممكن اي مخبر في الشارع يثبت اي شاب ويبهدله

    لو الشاب ده عارف ان المخبر ده ملوش عنده حاجه
    مش حيديله بطاقة ولا حيديله اهتمام اساسا

    ولو المخبر ضرب او عمل اي حاجه
    المفروض يروح يعمله محضر ويجيب شهود من الشارع كمان

    حاجات كتير والله الواحد قلبه واجعة

    موضوع لو اتكلمنا فيه عايزين كتير اوي

    بوست جامد احييكي عليه

     
  • At February 19, 2007 at 2:42:00 AM PST, Blogger متغيرة شوية

    sharkawoo

    حتى لو بيقول لأ فهو بيقولها في سره ، ولو قالها بصوت عالي مبيتبعهاش بالفعل ، ولو اتبعها بالفعل فمحدش بيسانده ، فبيروح ورا الشمس وصوته مبيتسمعش تاني

     
  • At February 19, 2007 at 2:51:00 AM PST, Blogger متغيرة شوية

    شارم

    المشكلة ان كلنا نعرف أمثلة زي دي ، والغريب ان بقى ده العادي
    البلد بلد أبوهم يا راجل

     
  • At February 19, 2007 at 2:59:00 AM PST, Blogger متغيرة شوية

    الغزالي

    انت عندك حق ، بس ياريت نعر نتكلم كلنا ، في نفس واحد

     
  • At February 22, 2007 at 2:22:00 AM PST, Blogger Sharm

    تفتكري ممكن يجي يوم من الايام الظباط يبقوا كويسيين و بنحبهم