Monday, June 25, 2007
!! والنبي ناولوني الولاعة

خبر صغير بريء مكتوب بفونت متوسط على شمال الصفحة المشئومة (حوادث وقضايا) بيقول " فصل مدرس هتك عرض تلميذاته " !

المحكمة التأديبية قضت بفصل المدرس اللي هتك عرض 5 من تلميذاته اللي لسة في الابتدائية أثناء ما كان بيديهم دروس خصوصية وبصراحة معرفش أضحك ولا أعيط لكن أعتقد اللطم رد فعل مش بطال مبدأياً!

و مش قادرة أتخلص من حالة الذهول لحد دوقتي لعدة أسباب:

أولاً المفروض دول أطفال ياعالم لسة ميعرفوش حاجة لسة بمنتهى البراءة اللي ربنا خلقهم بيها أفهم أنا بقى المدرس الحيوان ده ايه مبرراته المقنعة في إنه يعمل كدة؟

ثانياً إن المدرس ده (الحيون برضو) المفروض إنه يكون أبوهم أو أخوهم الكبير والمفروض إنهم في حمايته طول ما هما معاه لكن واضح إنه استباح كل حاجة وقرر يكون حاميها حراميها باعتبار إن هو ده المبدأ اللي البلد كلها بتطبقه حالياً و تقريباً ده المبدأ الوحيد اللي بلدنا بتطبقه بضمير متفاني بجد!

ثالثاً وهو الأدهى إن المدرس(خلاص عرفنا صفته دوقتي) اتقدم لمحكمة تأديبية!! على أساس إنه مثلا داس على رجل الناظر أو نسي يدي كشكول التحضير للموجه(يانهار إسود!!) يعني يهتك عرض خمس بناااااااات و يضيع مستقبلهم وبراءتهم ويدمرهم نفسياً ويبوظ حياتهم بالكامل والمصيبة إنه يرتكب جريمته البشعة دي خمس مرات وعادي احنا زي الفل مجرد نقدمه لمحكمة تأديبية!! مش جنح ولا جنايات(يستاهلها وأكتر) لأ محكمة تأديبية بمعنى أدق دم خمس بنات مش مهم للدرجة عند الوزارة وعند الحكومة بالتبعية!

رابعاً وأخيراً قرار الفصل اللي هو من نوعية إن الوزارة قالت للمدرس انت وحش وشرير واحنا زعلانين منك ومش هنكلمك تاني يلا امشي بقى روح اعمل اللي انت عايزه في ناس تانين!واحد زي ده المفروض بدون أي مبالغة يترجم لحد ما يموت أو يتعدم، إذا كنا بنرضى بحكم المحكمة بسبع سنين و أكتر في حالات هتك العرض للكبار ما بالنا بالأطفال أعتقد ده يستحق يتشنق خمس مرات!

وعشان ما بقاش ظالمة ومفترية مش هطالب بإعدام وزير التربية والتعليم في ميدان عام ولا هطالب حتى بالحكم عليه 25 سنة مؤبد بسبب جرايمه ابتداءً ب(آية) صاحبة موضوع التعبير إياه مروراً ب(أميرة) ضحية موكب سيادته وانتهاءً بالخمس بنات دول لكن كل اللي اقدر أطلبه من السيد الوزير وأترجاه فيه إنه يخلي عنده شوية دم ويستقيل وربنا يعوض علينا في جيل بحاله!

 
posted by مَلَكة at 5:45 PM | Permalink |


25 Comments:


  • At June 27, 2007 at 2:23:00 PM PDT, Blogger مصرى

    فصلوا المدرس كأنه تغيب أكتر من 15 يوم مع إنه ممكن يكون في الحقيقة قتل خمس أطفال معنويا أثر الإعتداء على طفل ممكن يلازمه طول عمره ده لو إ تكلمنا على الأثر النفسي بس
    لازم يكون في عقوبة عقوبة الإعتداء على طفل لازم تكون مشددة مش بس فصل و لا حتى سجن 6 أشهر زي جرايم التحرش العادية

     
  • At July 7, 2007 at 2:57:00 AM PDT, Blogger زحل الفلكي

    معايير متلخبطة
    وناس بتبص للحاجت من مناظير عجيبة

    وربنا يرحمنا برحمته الواسعة

     
  • At July 8, 2007 at 11:16:00 AM PDT, Blogger gawafaa

    عزيزتي انا حره
    اذا مكنش في احترام للانسان لكونه انسان في بلدنا فتوقعي اي حاجه تحصل
    توقعي ان اهم شريحه في المجتمع الي هما الاطفال اللي المفروض يبقوا فاهمين ان اي حاجه بتحصلهم بتاثر عليهم بقيت العمر
    بس هي بلدنا حكومتنا سياستنا الذيذه مش فاضيه غير للاخوان والحبس والبهدله
    دا احنا سمعتنا زي الزفت الحمد لله
    تحياتي

     
  • At July 9, 2007 at 11:36:00 AM PDT, Blogger أنـــا حـــــــــرة

    جوافه

    اللى كاتبه الموضوع ده ملكة
    مش انا

    :)

     
  • At July 9, 2007 at 11:38:00 AM PDT, Blogger أنـــا حـــــــــرة

    ملكة

    اهدى الله يرضى عنك
    هى البلد ايه فيها معدول علشان دى متبقاش متشقلبة
    بصى انا مش شايفه ان الحكم ده بيعكس سياسة وزير التربية و لامؤاخذة التعليم
    ده بيعكس سياسة دولة
    يعنى الولاعة متنفعش معاهم

    تصدقى بايه
    احنا عايزين نقضى العمر كله وقفات احتجاج علشان يفكروا يقولوا هو فى حاجه ؟

     
  • At July 9, 2007 at 12:33:00 PM PDT, Blogger واحد مصرى

    ما هو لو كان ده حصل لبنت واحد من العرر اللي اكتفوا بوقفه كانوا حطوا اللي عمل فيها كدة اتحط على خازوق معتبر

     
  • At July 10, 2007 at 5:20:00 PM PDT, Blogger ملكة

    مصري

    انت بتقول فيها؟
    والله أنا معتبرة اللي حصل ده جريمة قتل مع سبق الاصرار
    لأن مؤكد اللي حصل للبنات دول هيفضل ملازمهم طول حياتهم على شكل عقد وأمراض نفسية
    المفروض إن فيه عقوبات أشد لمن هم أقل من السن القانونية
    إنما هو فيه حد بقى بيتحاسب في البلد دي أصلا؟؟

     
  • At July 10, 2007 at 5:22:00 PM PDT, Blogger ملكة

    زحل

    آمين يارب
    ولو إن المعايير بعد ما اتلخبطت اختفت تماماً
    مبقاش عندنا معايير ولا أي بتنجان والحمد لله

     
  • At July 10, 2007 at 5:24:00 PM PDT, Blogger ملكة

    جوافة

    أنا وهي واحد حصل خير:)

    أنا متوقعة بالفعل أي حاجة
    لكن مش للأطفال
    ده كفر بيّن يعني!!

    على رأيك يعني الحكومة هتفضى لإيه ولا لإيه؟

    الله يرحمنا ويحسن إلينا
    والله كنا شعب طيب ومسالم ومهااااااود ومطرمخ أوي على رأي محمد صبحي

     
  • At July 10, 2007 at 5:29:00 PM PDT, Blogger ملكة

    ياسمين

    بذمتك الدعوة للهدوء في بلد زي دي مش هتبقى ضرباً من ضروب العبث في اللامضمون؟؟
    حطي نفسك مكان بنت منهم وانتي تقوليلي هتحسي بإيه كمان 5 سنين او 10 كدة
    ما المصييييبية انها سياسة دولة
    بس دي مش سياسة كدة
    دي تبقى اسمها بزرميط معتبر

    والنبي لو عملنا اضراب لحد ما نموت حتى ولا هياخدوا بالهم
    يابنتي دول النموذج المثالي لحيوانات يطلق عليها مجازاً"حلاليييف"!!

     
  • At July 10, 2007 at 5:30:00 PM PDT, Blogger ملكة

    واحد مصري

    هييجي يوم ويتعمل فيهم كدة
    أصل ربنا مابيسيبش وده اللي انا متأكدة منه
    ربما يقيني الوحيد في البلد دي
    إن كل واحد فيهم هيشرب من نفس المر اللي شربه للناس

     
  • At July 11, 2007 at 12:25:00 AM PDT, Blogger و القادم....أجمل

    حسبي الله و نعم الوكيل

    الاستاذ و الوزير هما الاتنين
    الصفة اللي انتي قولتيها
    :)
    منهم لله حكامنا
    حسابهم في الاخرة

    تحياتي و تقديري لك

     
  • At July 15, 2007 at 2:26:00 PM PDT, Blogger ملكة

    والقادم..يارب يبقى أجمل بجد

    آآآآمين

    والله أنا مش لاقية حاجة اعملها كمواطنة مصرية بحتة إلا إني أسلم أمري لله

     
  • At July 18, 2007 at 5:14:00 PM PDT, Blogger mariam

    الواحد بقى يسمع حاجات غريبه
    دى كارثه
    هى الناس خلاص مبقاش عندها احساس

    مش عارفه اقول ايه

    صحيح خدى الولاعه

    تحياتى

     
  • At July 20, 2007 at 4:02:00 AM PDT, Blogger أنـــا حـــــــــرة

    ابنتي دول النموذج المثالي لحيوانات يطلق عليها مجازاً"حلاليييف"!



    :)

     
  • At July 25, 2007 at 10:14:00 AM PDT, Blogger غجرية

    i watch oprah and how she fight 4 a stronge punshment 4 child abuse dad always thought that this is so out of our culture and acuse me of being so affected by the american culture i think a lot of older ppl think so and still treat this horrobel act as single accedent maybe it is out turn to ask 4 a strong punshment 4 child abuse!

     
  • At July 26, 2007 at 2:48:00 AM PDT, Blogger dr.Roufy

    معايير ..فاسدة..ولا معقولة فعلا

    وزمن اصبح مقلوب..ولا معقووووول

     
  • At July 30, 2007 at 12:42:00 PM PDT, Blogger ملكة

    مريم

    بالظبط
    الناس مبقتش تحس بقى فيه لا مبالاة غريبة واستسهال الخطأ وكأنه القانون العادي ده المصيبة
    ب بصراحة أنا شايفة إن ده مجرد رد فعل طبيعي جدا على حقبة كلها بلاوي ومصايب من أولها لآخرها وناس اتولدت لقت نفها عايشة في سجن أصلا
    طب متوقعين ايه بعد كدة؟؟

    ميرسي كتير ع الولاعة يا مريم وربنا جاية في وقتها تمام

     
  • At July 30, 2007 at 12:42:00 PM PDT, Blogger ملكة

    ياسمين

    مش بذمتك عندي حق؟؟

     
  • At July 30, 2007 at 12:47:00 PM PDT, Blogger ملكة

    غجرية

    I'm completely with ur point and the thing that i really repect in the foreign communities is thier strict laws protecting children from being abused by the others.
    I do not think that demanding protection in those cases is a result of an over effect of watching American programmes talking about this.We've the ame cases or even more so why can't we get a set of laws to spread some safety in children's life?!

     
  • At July 30, 2007 at 12:49:00 PM PDT, Blogger ملكة

    dr.roufy

    وايه بقى معقول دوقتي؟

    عشان كدة عندنا اللامعقوليزم دي
    بكمالة اللامعقولات الحياتية!

     
  • At September 5, 2007 at 8:18:00 AM PDT, Blogger 3ala asm masr

    حسبى الله ونعم الوكيل
    مش عارفه بعد كده هنوصل لايه وتلاقى الخبر عدى على ناس كتير كده عادى ومحدش وقف عنده اساسا
    محدش بيتحاكم محدش بياخد حقه
    وعايزه اقولك ان مش بس دم ال5 بنات دول اللى راح على الارض دم المصريين كلهم بقى مباح
    وكويس انهم فصلوه مقالوش مختا عقليا وسابوه اصل كل المجرمين بقوا مختلين عقليا
    لكى الله يا مصر

     
  • At November 2, 2007 at 9:06:00 PM PDT, Blogger تائهة فى أرض الأحلام

    انتى بجد فتحتى موضوع جامد فعلا على المدونات

    لان اغتصاب الأطفال ده بقى بعبع كل بيت مصرى

    اعرف واحدة مش عايز تودى بنتها المدرسة ولا تشترك فى الاتوبيس بتاعها بسبب انها قرات حادثة عن اغتصاب سائق اتوبيس مدرسة لطفلة كل يوم يخليها اخر واحدة
    وكل ده بسبب غياب مشرفة الاتوبيس
    ربنا يحينا ويحمى ولادنا اللى لسه ماجوش

     
  • At March 20, 2008 at 7:37:00 AM PDT, Blogger dreamer

    ليهدهم الله
    اعتقد انه كان هناك اقتراحًا في مجلس الشعب باخصاء المغتصبين جميعهم ، فماذا يقترحون لمغتصبي الاطفال ؟

     
  • At September 29, 2008 at 3:12:00 PM PDT, Blogger مطحون الغلبان

    والله الشعب دة هايفضل مغلوب على امرة كتير والجاى اسوء بس طول مافى ربنا هايبقى فى امل فى ضماير الناس واحب اعقم على كلمة السيد المسئول اناوالدى الاول مدير مدرسة

    هههههههههههههههههههههه
    مش معنى كدة انى معهم لا انا مع الناس التانين والاستاذ اللى ارتكب الجريمة دى حاجة من الاتنين للقصاص منة الاولى الاعدام بس مش بالرجم لا بطريقة شيك وحلوة اوى ومهذبة بالشلاليت يعنى شايف اناه طريقة جديدة وشيك التانية نفس اللى عملة مع الاطفال يفعل فية شخصيا بجد عندى هستريا من ساعة الموضوع دة مش من الاستاذ نفسة كلنا طبعا عارفين عقابة اية بس عقاب اللى عاقبة اية بقى هو دة اللى بفكر فية وياريت تحاولو تساعدونى اوصل لعاقب ملائم ليهم وعمار يامصر